मन सुन्न करणारी घटना..! पहिल्यांदा पत्नीची गळा चिरून हत्या व नंतर पतीनेही घेतला गळफास..

नांदेड :-जिल्ह्याच्या हिमायतनगर तालुक्यात मन सुन्न करणारी घटना आज,मंगळवार १२ मे रोजी सकाळच्या सुमारास उघडकीस आली.पहिल्यांदा पतीने ३५ वर्षीय पत्नीचा गळा चिरून खून केला व नंतर पश्चाताप होताच पतीने गावालगतच्या शिवारात गळफास घेऊन स्वतः ही आत्महत्या केल्याची घटना नांदेड जिल्ह्याच्या हिमायतनगर तालुक्यातील बोरगडी तांडा गावात उघडकीस आली.पायल विनोद राठोड वय ३५ वर्षे व विनोद रंगराव राठोड वय ४० वर्षे,रा. धारजणी फुलवाडी तांडा,ता.भोकर,जि.नांदेड असे  मृतक पती-पत्नीचे नाव आहे.

पायल व विनोद हे दोघेही पती-पत्नी आपल्या तीन मुलांना घेऊन हिमायतनगर तालुक्याच्या बोरगडी तांडा नंबर-१ येथे मेव्हण्याच्या(चुलत भाऊ) विवाहासाठी गेले होते.दरम्यान,पायलने लग्न समारंभात डिजेवर नृत्य केला होता.यावरून दोघा पती-पत्नीत वाद झाला.अश्यातच मध्यरात्रीच्या सुमारास पत्नीने लग्नात नृत्य केल्याच्या रागातून विनोदने पत्नी पायलचा गळा चिरून हत्या केली.यावेळी तो दारूच्या नशेत धुत असावा,असा अंदाज ग्रामस्थांनी व्यक्त केला व पहाटे दारूची नशा उतरताच त्याने भीतीपोटी गावालगतच्या शिवारात जाऊन गळफास घेऊन आत्महत्या केली असावी.सदरचा प्रकार आज सकाळच्या सुमारास उघडकीस आल्याने परिसरात एकच खळबळ माजली.घटनेची माहिती मिळताच घटनास्थळी उपविभागीय पोलिस अधिकारी वैजने, पोलिस निरीक्षक अमोल भगत व पोलीस पथकाने भेट देत घटनेचा पंचनामा करून पुढील तपास सुरू केला आहे.पती-पत्नीच्या मृत्यूने एक लहान मुलगा व दोन मुली आई-वडीलाविना पोरकी झाल्याने सर्वत्र हळहळ व्यक्त केली जात आहे.