उद्रेक न्युज वृत्त
अमरावती :- नाली बांधकामाचे बिल मंजूर झाल्याचा मोबदला म्हणून ७२ हजार रुपयांची लाच स्वीकारणाऱ्या सार्वजनिक बांधकाम विभागातील उपविभागीय अधिकाऱ्यासह कनिष्ठ अभियंत्याला लाचलुचपत विभागाच्या पथकाने रंगेहाथ अटक केली.सदरची कारवाई काल,१ जुलै रोजी सायंकाळी सार्वजनिक बांधकाम प्रादेशिक विभाग कार्यालयाच्या आवारात करण्यात आली.
उपविभागीय अधिकारी सुनील विठ्ठलराव मेश्राम वय ५४ वर्षे व कनिष्ठ अभियंता वृषभ गजानन किटुकले वय २८ वर्षे अशी अटक करण्यात आलेल्या लाचखोरांची नावे आहेत.या प्रकरणातील तक्रारदार हे कंत्राटदार असून,त्यांनी सार्वजनिक बांधकाम (विशेष प्रकल्प) अमरावतीमार्फत नांदगाव खंडेश्वर येथे नाली बांधकाम केले होते.या बांधकामाचे बिल मंजूर झाल्याचा मोबदला म्हणून उपविभागीय अधिकारी सुनील मेश्राम व कनिष्ठ अभियंता वृषभ किटुकले या दोघांनी त्यांना १ लाख रुपयांच्या लाचेची मागणी केली.त्यांनी लाचलुचपत विभागाकडे तक्रार दाखल केली.तक्रारीच्या पडताळणीत सुनील मेश्राम व वृषभ किटुकले यांनी तडजोडीअंती ७२ हजार रुपयांच्या लाचेची मागणी करून स्वीकारण्याचे मान्य केले. त्यानुसार सापळा रचण्यात आला.सुनील मेश्राम व वृषभ किटुकले यांनी तक्रारदार कंत्राटदाराकडून लाचेची ७२ हजार रुपयांची रक्कम स्वीकारताच दबा धरून बसलेल्या पथकाने त्यांना रंगेहाथ अटक केली. त्यांच्याविरुद्ध गाडगेनगर ठाण्यात गुन्हा दाखल करण्यात आला.ही कारवाई एसीबीचे पोलिस अधीक्षक मारूती जगताप यांच्या नेतृत्वात पोलिस निरीक्षक केतन मांजरे,प्रवीणकुमार पाटील व चित्रा मेसरे यांच्यासह अंमलदार महेंद्र साखरे, वैभव जायले, उमेश बोपते, अभिजीत उमक यांनी केली.
