‘त्या’ वकिलाला चपलाचा प्रसाद; व्हिडिओ व्हायरल.

उद्रेक न्युज वृत्त :-सर्वोच्च न्यायालयात ६ ऑक्टोंबर २०२५ रोजी सुनावणीदरम्यान घडलेल्या घटनेने सर्वत्र तीव्र पडसाद उमटले होते.न्यायालयाच्या कोर्ट नंबर एकमध्ये मध्य प्रदेशातील खजुराहो येथील जवारी मंदिरातील भगवान विष्णूची छिन्नविच्छिन्न मूर्ती परत बसवण्याच्या प्रकरणावर नियमित सुनावणी सुरू होती. सुनावणीदरम्यान सकाळी सुमारे ११:३५ वाजता ७१ वर्षीय वकील राकेश किशोर यांनी अचानक पायातील बूट काढून माजी सरन्यायाधीश न्यायमूर्ती बी.आर.गवई यांच्याकडे फेकण्याचा प्रयत्न केला.त्यावेळी उपस्थित वकील आणि सुरक्षा कर्मचारी यांनी त्यांना तातडीने रोखले.या सर्व घडामोडीमुळे न्यायालय परिसरात तणाव वाढला होता.त्यावेळी सुरक्षा कर्मचाऱ्यांनी त्यांना त्वरित पकडले होते.मात्र,यानंतरही गवई यांनी त्यांना माफ केले होते.राकेश किशोर यांना या घटनेनंतर बार काऊन्सिलने निलंबित केले आहे.त्यामुळे पुढील आदेश येईपर्यंत त्यांना कायदेशीर प्रकरणांमध्ये कोणतेही काम करता येणार नाही.विरोध आणि टीका होत असूनही राकेश किशोर यांनी त्यांच्या कृतीबद्दल खेद व्यक्त केला नव्हता.उलट, त्यांनी हे करतांना “भगवानाने स्वप्नात सांगितले” असा दावा केला होता.अश्यातच आता माजी सरन्यायाधीश न्यायमूर्ती बी.आर.गवई यांच्यावर बूट फेकणारे वकील राकेश किशोर यांना आज,मंगळवार ९ डिसेंबर रोजी दिल्लीतील न्यायालय परिसरात काही वकिलांनी चपलाचा प्रसाद दिल्याची घटना घडली आहे.याबाबत सोशल मीडियावर व्हिडिओ व्हायरल झाला आहे.ही घटना त्या वेळी घडली,जेव्हा ते न्यायालय परिसरात उपस्थित होते.काही वकिलांनी त्यांना धक्काबुक्की केली आणि चपलांनी हल्ला केला.परिस्थिती बिघडू नये म्हणून न्यायालयातील सुरक्षा कर्मचाऱ्यांनी हस्तक्षेप करून त्यांना तातडीने बाहेर नेले.राकेश किशोर हे दिल्ली बार कौन्सिलमध्ये २००९ पासून नोंदणीकृत वरिष्ठ वकील आहेत.