जंगली डुकराची दुचाकीला धडक; एकाचा मृत्यू,तर एकजण गंभीर जखमी..

गडचिरोली :-जिल्हा मुख्यालयापासून अगदी हाकेच्या अंतरावर जंगली डुकराची धावत्या दुचाकीला जोरदार धडक बसल्याने दुचाकीवरील एकाचा मृत्यू झाला,तर एकजण गंभीर जखमी झाल्याची घटना आज,बुधवार २७ मे रोजी सायंकाळच्या सुमारास गडचिरोली-चांदाळा मार्गावर घडली.नागसेन साखरे वय ४० वर्षे,रा.शिवणी (वैरागड),ता.आरमोरी,जि.गडचिरोली असे मृतकाचे नाव आहे.तर राजेश जगन्नाथ रोहनकर वय ४० वर्षे,रा.फुले वॉर्ड,गडचिरोली असे गंभीर जखमीचे नाव आहे.

नागसेन साखरे व राजेश रोहनकर हे दोघेही आज सायंकाळच्या सुमारास गडचिरोलीहून दुचाकीने चांदाळा गावाकडे जाण्यासाठी निघाले होते.सदरचा मार्ग हा जंगल परिसराने वेढलेला असल्याने मार्गावरून जात असतांनाच जंगल परिसरातून मार्गक्रमण करणारा जंगली डुक्कर दुचाकीला येऊन धडकला.यात दुचाकीवरील नागसेन व राजेश खाली कोसळून नागसेन साखरे यांच्या डोक्याला गंभीर मार लागला.यातच त्यांचा मृत्यू झाला,तर राजेश यांच्याही डोक्याला गंभीर दुखापत झाली.दरम्यान,मार्गावरून जाणाऱ्या नागरिकांनी दोघांनाही तात्काळ गडचिरोली जिल्हा सामान्य रुग्णालयात दाखल केले असता डॉक्टरांनी तपासणीअंती नागसेन यांना मृत घोषित केले,तर राजेश यांच्यावर रुग्णालयात उपचार सुरू आहेत.घटनेने साखरे कुटुंबियांवर मोठा आघात केला असून परिसरात हळहळ व्यक्त केली जात आहे.