घराजवळ खेळत असतांना वाघाचा हल्ला; चिमुकल्याचा मृत्यू..

गोंदिया :-चंद्रपूर,नागपूर,भंडारा व आता गोंदिया जिल्ह्याच्या काही भागात वाघाची डरकाळी अन् मनुष्याचा जीव घेण्याच्या घटना उघड होऊ लागल्या आहेत.अश्याच प्रकारे काल शुक्रवारच्या रात्री साडे नऊ वाजेच्या सुमारास घराजवळ खेळत असलेल्या एका सहा वर्षीय चिमुकल्याला वाघाने ठार केल्याची घटना गोंदिया जिल्ह्याच्या अर्जुनी-मोरगाव तालुक्यात उघडकीस आली आहे.प्रज्वल गोवर्धन मेश्राम वय ६ वर्षे,रा.आदर्श धाबेटेकडी,ता.अर्जुनी-मोरगाव,जि.गोंदिया असे वाघाच्या हल्ल्यात ठार झालेल्या मृत चिमुकल्याचे नाव असून तो घराजवळ खेळत होता.खेळत असतांनाच दबा धरून बसलेल्या वाघाने अचानकपणे प्रज्वलवर हल्ला चढवला आणि जंगलाच्या दिशेने ओढत नेले.दरम्यान,सदरचे दृश्य कुटुंबियांच्या नजरेस पडताच त्यांनी आरडाओरड केली. लागलीच ग्रामस्थांनीही जोरजोराने ओरडायला सुरुवात केल्याने वाघाने चिमुकल्याला सोडून जंगलाच्या दिशेने धूम ठोकली.त्यानंतर,ग्रामस्थांनी एकत्र येत तात्काळ शोधमोहीम सुरू केली.काही वेळानंतर घरापासून काही अंतरावर प्रज्वल गंभीर जखमी अवस्थेत आढळून आला. मात्र,तो पर्यंत चिमुकल्याने प्राण सोडला होता.घटनेने परिसरात एकच खळबळ माजली असून सर्वत्र भीतीचे वातावरण पसरले आहे.चिमुकल्याच्या दुर्दैवी मृत्यूने कुटूंबीय शोकसागरात बुडाला असून परिसरात हळहळ व्यक्त केली जात आहे.