उद्रेक न्युज वृत्त
गडचिरोली :- आरोग्य विभागाच्या कारवाई अभावी गडचिरोली जिल्ह्याच्या अनेक तालुक्यातील ग्रामीण भागांत पदवी नसलेल्या बोगस डॉक्टरांचा मोठ्या प्रमाणात सुळसुळाट झाला असून कोणतीही पदवी नसताना रुग्णालये थाटून ते उपचार करीत आहेत. कोरोनाकाळातही त्यांनी लाखो रुपयांची माया जमविली.मात्र त्यांच्यावर कारवाई होत नसल्यामुळे अशा बोगस ‘मुन्नाभाई’चे मनोबल वाढले आहे.मागील कोरोनाचा काळ नागरिकांसाठी आपत्तीचा ठरला होता.अनेक कुटुंबांची कोरोनावरील उपचार घेताना हातातील पैसे गेले.अनेकांनी जमीन विकून उपचार केला.त्यातच बोगस डॉक्टरांचेही चांगलेच फावले.ज्या काळात ग्रामीण भागांत रुग्णांना बेड मिळणे कठीण झाले होते,त्या काळात या डॉक्टरांनी लाखो रुपयांची माया जमविली.पदवी नसतानाही अशा डॉक्टरांकडून उपचार घेताना अनेक कुटुंबातील प्रतिष्ठित व्यक्तींना जीव गमवावा लागला.
अशी अनेक उदाहरणे कोरोनाच्या दुसऱ्या लाटेत पाहायला मिळाली.अशावेळी पदवी नसलेल्या डॉक्टरांवर कारवाई करण्याची गरज होती,जी दुर्दैवाने होऊ शकली नाही.त्यामुळे अशा अनेक बोगस डॉक्टरांनी लाखोंची मालमत्ता जमा केली आहे.परंतु आरोग्य विभागाकडून या प्रकारावर एकदाही कारवाई झालेली नाही.ग्रामीण भागांत हे डॉक्टर मोठ्या प्रमाणात सक्रिय होत आहेत.शिवाय ते आता खासगी दवाखानेही सुरू करीत आहेत तर काही गावांमध्ये आरोग्य विभागाची परवानगी नसतानाही नर्सिंग होम सुरू असल्याची चर्चा आहे.नागरिकांच्या आरोग्यासाठी धोकादायक बनलेल्या या विषयाला प्रशासन गांभीर्याने घेत नाही.त्यामुळे आता प्रशासनाने हा विषय गांभीर्याने घेण्याची गरज असून, त्यामध्ये पदवी नसलेल्या डॉक्टरांवर कारवाई करणे अत्यंत गरजेचे आहे.
