गैरमार्गाने संपत्ती गोळा केल्याप्रकरणी देसाईगंजचे तत्कालीन वनपरिक्षेत्राधिकारी कोरेवार यांच्यावर अपसंपदेचा गुन्हा दाखल..

गडचिरोली :-मिळणारे वेतन कमी आणि संपत्ती जास्त हेही घातकच असते; याची हल्ली प्रचिती दिसून आली आहे.एकेकाळी गडचिरोली जिल्ह्याच्या वन विभागातील वनपरिक्षेत्र कार्यालयात वनपरिक्षेत्र अधिकारी म्हणून कार्यरत असलेल्या वनाधिकाऱ्याची

बदली फिरत्या वनपरिक्षेत्रात झाली अन् होत्याचे नव्हते झाले.गैरमार्गाने ६६ लाख रुपयांची संपत्ती गोळा केल्याप्रकरणी लाचलुचपत प्रतिबंधक विभागाच्या अधिकाऱ्यांनी देसाईगंज(वडसा)येथील फिरत्या वनपरिक्षेत्राचे तत्कालिन वनपरिक्षेत्राधिकारी दिवाकर रामभाऊ कोरेवार यांच्यावर अपसंपदेचा गुन्हा दाखल केला आहे.कोरेवार हे सध्या पालघर जिल्ह्यातील वाडा तालुक्यातील पाली वनआगाराचे वनपरिक्षेत्राधिकारी म्हणून कार्यरत आहेत.

२०२० मध्ये दिवाकर कोरेवार व त्याच्या अधिनस्थ महिला कर्मचाऱ्यांवर १ लाख ७५ हजार रुपयांची लाच स्वीकारताना लाचलुचपत प्रतिबंधक विभागाने रंगेहाथ पकडून कोरची पोलिस ठाण्यात गुन्हा दाखल केला होता.तेव्हापासून कोरेवारची चौकशी सुरु होती. त्याअनुषंगाने एसीबीचे पोलिस निरीक्षक शिवाजी राठोड यांना चौकशीदरम्यान दिवाकर कोरेवार याच्याकडे ज्ञात व कायदेशीर उत्पन्नापेक्षा ६६ लाख ८ हजार ४०४ रुपये अधिक आढळून आले.ही अपसंपदा ८३.०३ टक्क्यांनी अधिक आहे.यामुळे अपसंपदा गोळा केल्याप्रकरणी दिवाकर कोरेवार आणि ही अपसंपदा संपादित करण्यासाठी प्रोत्साहन दिल्यामुळे त्याच्या पत्नीवर गडचिरोली पोलिस ठाण्यात भ्रष्टाचार प्रतिबंधक कायद्याच्या अंतर्गत गुन्हा दाखल करण्यात आला आहे.त्यानंतर आज,शुक्रवारी २० सप्टेंबरला कोरेवार याच्या गडचिरोली शहरातील रामनगर येथील घराची झडती घेण्यात आली.शिवाय पालघर येथील लाचलुचपत प्रतिबंधक विभागाच्या चमूने कोरेवार सध्या राहत असलेल्या वाडा येथील निवासस्थानाचीही झडती घेतली आहे.