गडचिरोली व कुरखेडाच्या दादापुर येथील रुग्णांना मिळाली मुख्यमंत्री सहायता निधीतून मदत..

गडचिरोली :-मुख्यमंत्री देवेंद्र फडणवीस यांनी गडचिरोली जिल्ह्यातील दोन गरजू रुग्णांना उपचारासाठी मुख्यमंत्री सहायता निधीतून प्रत्येकी एक लाख रुपयांची मदत मंजूर केली आहे.यामध्ये , गडचिरोलीच्या गोकुलनगर येथील रहिवासी किरण दिनेश कोहचाळे तर कुरखेडा तालुक्याच्या दादापूर येथील तथागत मोहन वैद्य यांचा समावेश आहे.हे दोन्ही रुग्ण सध्या नागपूर येथे उपचार घेत असून किरण कोहचाळे यांना हृदयरोगाच्या उपचारासाठी तर तथागत मोहन वैद्य यांना मेंदूरोगाच्या उपचारासाठी मदत देण्यात आली आहे.

मुख्यमंत्री सहायता निधीच्या माध्यमातून पूर, दुष्काळ,आगसदृश्य नैसर्गिक आपत्तींमध्ये बाधित झालेल्या नागरिकांना तातडीने मदत केली जाते. तसेच,हृदय,किडनी,यकृत,फुफ्फुस प्रत्यारोपण, कर्करोग,अपघात,नवजात शिशूंचे आजार,मेंदू विकार, डायलिसीस अशा महागड्या उपचारांची गरज भासणाऱ्या रुग्णांना मदत मंजूर केली जाते.यापूर्वी

३ जून २०२५ रोजी कुरखेडा येथील अविनाश दुबे यांना हृदयविकारावरील उपचारांसाठी एक लाख रुपयांची मदत या कक्षाच्या माध्यमातून करण्यात आली होती.त्यानुसार आता जिल्ह्यातील तीन रुग्णांना मुख्यमंत्री सहायता निधीतून मदत करण्यात आली आहे.

जिल्ह्यातील इतर गरजू आणि पात्र रुग्णांनीही मुख्यमंत्री सहायता निधीचा लाभ घेण्याचे आवाहन गडचिरोली जिल्हाधिकारी अविश्यांत पंडा यांनी केले आहे.यासाठी त्यांनी जिल्हाधिकारी कार्यालयातील मुख्यमंत्री सहायता कक्षाशी संपर्क साधावा असेही त्यांनी सांगितले.यामुळे अनेक गरजू रुग्णांना उपचारासाठी आवश्यक आर्थिक मदत मिळू शकते.मुख्यमंत्री सहायता निधी गरजू रुग्णांना त्यांच्या गंभीर आजारांवरील उपचारासाठी आर्थिक मदत देऊन आधार देत आहे.