उद्याला गडचिरोली,अहेरी,आरमोरी,चामोर्शी, देसाईगंज,धानोरा,कुरखेडा व सिरोंचा येथे राष्ट्रीय लोकअदालतीचे आयोजन..

गडचिरोली :-महाराष्ट्र राज्य विधी सेवा प्राधिकरण, मुंबई यांचे निर्देशान्वये व विनायक रा.जोशी अध्यक्ष जिल्हा विधी सेवा प्राधिकरण तथा प्रमुख जिल्हा व सत्र न्यायाधीश गडचिरोली यांचे मार्गदर्शनाखाली जिल्हा विधी सेवा प्राधिकरण गडचिरोलीच्या वतीने उद्या,शनिवार १० मे रोजी राष्ट्रीय लोकअदालतीचे आयोजन करण्यात आले आहे.जिल्हा व सत्र न्यायालय गडचिरोली/अहेरी तसेच तालुका न्यायालय अहेरी,आरमोरी,चामोर्शी,देसाईगंज,धानोरा,कुरखेडा व सिरोंचा येथे आयोजित या लोकअदालतीमध्ये ४० वर्षांपासून न्यायालयात प्रलंबित असलेली तडजोडीस पात्र फौजदारी प्रकरणे,दिवाणी दावे तसेच दाखलपूर्व प्रकरणे दोन्ही पक्षकारांच्या सहमतीने आपसी तडजोडीने निकाली काढण्यात येणार आहेत.या लोकअदालतीमध्ये १३८ एन.आय.ॲक्ट प्रकरणे, भूसंपादन प्रकरणे,कौटुंबिक प्रकरणे,मोटार वाहन अपघात दावा प्रकरणे,दरखास्त प्रकरणे,बँकेशी संबंधित प्रकरणे तसेच दाखलपूर्व वाद,मोबाईल/टेलिफोन कंपनी,वीज वितरण,पतसंस्था,नगर परिषद व ग्रामपंचायत कर आकारणीचे प्रकरणे समाविष्ट असणार आहेत. लोकन्यायालयात पारित झालेल्या अवॉर्डची न्यायालयाच्या हुकूमनाम्याप्रमाणे अंमलबजावणी करता येते.या प्रक्रियेमुळे लोकांचा वेळ,श्रम व पैशाची बचत होते.तसेच दोन्ही पक्षकारांमध्ये गोडवा निर्माण होत असते. त्यामुळे नागरिकांनी जास्तीत जास्त संख्येने सहभागी होऊन लोकन्यायालयाचा लाभ घ्यावा,असे आवाहन आर.आर.पाटील सचिव जिल्हा विधी सेवा प्राधिकरण गडचिरोली यांनी केले आहे.