आमदार मसरामांची जिल्हाधिकारी अविश्यांत पंडा यांच्याशी विविध विषयांवर महत्वपूर्ण चर्चा…

गडचिरोली :-जिल्ह्यासह आरमोरी विधानसभा मतदारसंघातील विकासकामांबाबत तसेच इतर विविध विषयांवर आरमोरी विधानसभा क्षेत्राचे आमदार रामदास मसराम यांनी गडचिरोली जिल्हाधिकारी अविश्यांत पंडा यांची नुकतीच भेट घेत महत्वपूर्ण चर्चा करून लवकरात लवकर जिल्ह्यातील समस्या मार्गी लावण्यासाठी प्रयत्न करावेत,अशी मागणी केली आहे.

मसराम यांनी सर्वप्रथम ग्रामीण भागातील नागरिकांना जंगली प्राण्यांमुळे होणाऱ्या त्रासाबाबत तातडीने कार्यवाही करण्याची मागणी केली.वन्यप्राण्यांच्या हल्ल्यांमुळे निर्माण होणारे धोके कमी करण्यासाठी आणि विशेष बंदोबस्तासाठी शेतकऱ्यांना सरसकट सोलर तार,झटका मशीन तसेच फेंसिंग तार देण्याची आवश्यकता असल्याचे स्पष्ट केले.घरकुल योजनेंतर्गत लाभार्थ्यांना घरबांधणीसाठी आवश्यक असलेल्या रेतीपुरवठ्यावर चालू असलेल्या मुदतीत वाढ करण्यात यावी,यामुळे लाभार्थ्यांना त्यांच्या बांधकामाचे काम वेळेत पूर्ण करता येईल.तसेच जिल्ह्यातील विविध विकासात्मक प्रकल्पांवर सविस्तर चर्चा करण्यात आली.यात रस्ते, शिक्षण,आरोग्य,पाणीपुरवठा व रोजगार निर्मिती यांसारख्या मूलभूत सुविधांच्या सुधारणेसाठी धोरणात्मक निर्णय घेण्याची गरज अधोरेखित करण्यात आली.या भेटीदरम्यान,जिल्ह्यातील प्रशासनाने सर्वसमावेशक विकास साधण्यासाठी अधिक सक्रिय होण्याचे आवाहन करण्यात आले.यावेळी संबंधित विभागांचे अधिकारीही उपस्थित होते.