उद्रेक न्युज वृत्त
गोंदिया (आमगाव) :- आपल्याला पगार मिळावा; यासाठी आमगाव तहसील कार्यालयातील शिपायाने काल सोमवारी २७ फेब्रुवारी रोजी दुपारी ३ वाजताच्या सुमारास चक्क पिंपळाच्या झाडावर चढून वीरूगिरी केल्याने त्याला पाहण्यासाठी तहसील कार्यालयात तोबा गर्दी झाली होती.
सविस्तर वृत्त असे की,अर्जुनी-मोरगाव तालुक्यात कोतवाल म्हणून कार्यरत असलेल्या राकेश बोरकर याची सेवाज्येष्ठतेनुसार ऑगस्ट २०२२ मध्ये पदोन्नती झाली.त्याला आमगाव तहसील कार्यालयात शिपाई पदावर नियुक्ती देण्यात आली.परंतु काम करीत असतांना त्याला सहा महिन्यांपासून एकही रुपयाचे पगार दिले गेले नाही.महसूल अधिकारी व कर्मचाऱ्यांच्या निष्काळजीपणामुळे आपल्याला वेतन मिळाले नाही,असे गृहीत धरून त्याने २७ फेब्रुवारी रोजी दुपारी ३ वाजेच्या सुमारास तहसील कार्यालयातील पिंपळाच्या झाडावर चढला.झाडावर चढलेला पाहून लोकांची आरडाओरड झाली.परिणामी पाहण्यासाठी तहसील कार्यालयात तोबा गर्दी झाली.तुझी मागणी मान्य होईल,असे सांगताच तो खाली उतरला.पगार देण्याच्या मागणीला घेऊन झाडावर चढलेला राकेश बोरकर हा अवघ्या दहा मिनिटातच झाडावरून उतरला.नंतर त्याच्यावर कायदेशीर कारवाई करण्यासाठी त्याला आमगाव पोलिसांच्या स्वाधीन करण्यात आले.
