राज्यातील १३२ शासकीय औद्योगिक प्रशिक्षण संस्थांना मिळणार नवी ओळख… – आयटीआयचे नामकरण करण्याचा निर्णय…

उद्रेक न्युज वृत्त :-पूर्वी शासकीय औद्योगिक प्रशिक्षण संस्थांकडे पाहिजे त्या प्रमाणात विद्यार्थ्यांचा कल नव्हता.जस,जसे औद्योगिक विकासक्षेत्र वाढत गेले तस,तशी मागणी वाढून विद्यार्थी तथा युवक स्वयंरोजगाराकडे वळू लागले.त्यानुसार ग्रामीण व शहरी भागातील युवकांना रोजगाराभिमुख प्रशिक्षण देऊन त्यांना स्वयंरोजगारासाठी सक्षम करणे आणि खाजगी औद्योगिक आस्थापनांना कुशल मनुष्यबळ उपलब्ध व्हावे,या उद्देशाने राज्यात ४१९ शासकीय व ५८५ खाजगी औद्योगिक प्रशिक्षण संस्था कार्यरत आहेत.शासकीय औद्योगिक प्रशिक्षण संस्थेत शिकणाऱ्या विद्यार्थ्यांना अधिक गुणवत्तेचे प्रशिक्षण मिळावे,यासाठी कौशल्य,रोजगार,उद्योजकता व नाविन्यता विकास मंत्री मंगल प्रभात लोढा यांनी सर्व संस्थांना निर्देश दिले आहेत.याचबरोबर प्रशिक्षण संस्थेच्या नावातून विद्यार्थ्यांना प्रेरणा मिळावी,यासाठी विविध महनीय व्यक्तीमत्वांची नावे देण्याबाबतची बाब शासनाच्या विचाराधीन होती.प्रथम १४ शासकीय औद्योगिक संस्थांचे नामकरण करण्याचा निर्णय मंत्रिमंडळाद्वारे घेण्यात आला होता.महाराष्ट्रातील फक्त २ औद्योगिक संस्था सोडल्या तर इतर औद्योगिक संस्थांना या आधी कोणत्याही प्रकारची नावे नव्हती.त्यांनतर कौशल्य विकास विभागाद्वारे महाराष्ट्रातील शासकीय औद्योगिक संस्थांसाठी नागरिकांकडून नावाबाबत सूचना मागवण्यात आल्या होत्या.त्याप्रमाणे राज्यातील १३२ आयटीआयचे नामकरण करण्याचा निर्णय जाहीर करण्यात आला.यात नागपूर जिल्ह्यातील ८ संस्थांचा समावेश आहे.या व्यतिरीक्त गडचिरोली,गोंदिया, चंद्रपूर,भंडारा,छत्रपती संभाजीनगर,जळगाव,जालना, धाराशिव, धुळे, नंदुरबार,नागपूर,नांदेड,नाशिक, परभणी,बीड, बुलढाणा,मुंबई उपनगर, यवतमाळ, रत्नागिरी, रायगड, लातूर,वर्धा, वाशिम,सांगली,सातारा, सोलापूर,हिंगोली,अकोला,अमरावती आणि कोल्हापूर जिल्ह्यातील शासकीय औद्योगिक संस्थांना नवीन ओळख मिळाली आहे.त्यानुसार आता राज्यातील १३२ शासकीय औद्योगिक प्रशिक्षण संस्थांना महापुरुष, सामाजिक योगदान देणाऱ्या व्यक्तींची नावे देण्यात आली असून तसा शासन निर्णय निर्गमित करण्यात आला आहे.