मतदार यादीत नाव समाविष्ट करण्याचे आवाहन..-उद्या शेवटची तारीख..

उद्रेक न्युज वृत्त :-आगामी विधानसभा निवडणुकीत आपला मतदानाचा हक्क बजावता यावा; यासाठी आपले नाव मतदार यादीत समाविष्ट असणे आवश्यक आहे.ज्यांनी आपले नाव मतदार यादीत अद्याप समाविष्ट केलेले नाही त्यांना अजूनही उद्या दिनांक-१९ ऑक्टोंबर २०२४ पर्यंत मतदार यादीत आपले नाव नोंदवण्याची संधी असून ज्यांचे नाव यादीत नाही; अशांनी आपले नाव यादीत नोंदवावे; असे आवाहन मुख्य निवडणूक अधिकारी तथा प्रधान सचिव एस.चोक्कलिंगम यांनी केले.

विधानसभा सार्वत्रिक निवडणूक सन २०२४ चा कार्यक्रम जाहीर झाला असून येत्या २० नोव्हेंबर रोजी महाराष्ट्रातील एकूण २८८ विधानसभा मतदारसंघांत एकाच टप्प्यात मतदान होणार आहे.१९ ऑक्टोंबर रोजी रात्री पर्यंत ऑनलाईन किंवा ऑफलाईन पद्धतीने मतदार यादीत नाव नोंदणी करण्याची संधी उपलब्ध असून निरंतर मतदार नोंदणीचा कार्यक्रम अद्याप सुरू आहे. त्यामुळे ज्या पात्र नागरिकांची आतापर्यंत मतदार नोंदणी झालेली नाही,अशा नागरिकांनी नोंदणी करावी; असे आवाहन चोक्कलिंगम यांनी नागरिकांना केले आहे. अंतिम दिनांकाच्या १० दिवस अगोदरपर्यंत म्हणजेच उद्या १९ ऑक्टोंबर पर्यंत प्राप्त झालेले अर्ज क्र.६ मतदार यादीमध्ये नोंद घेण्यासाठी विचारात घेण्यात येतील.तरी या संधीचा लाभ घेऊन सर्व पात्र नागरिकांनी मतदार यादीत आपले नाव समाविष्ट करीत मतदानाचा आपला हक्क आवर्जून बजावावा; असेही आवाहन करण्यात आले आहे.