बिलाच्या रकमेच्या १५ टक्के मोबदला म्हणून तीन लाख रुपयांच्या लाचेची मागणी; १ लाख २० हजार स्वीकारतांना ताब्यात.. -गडचिरोली जिल्ह्यातील स्विकृत नगरसेवकावर गोंदिया लाचलुचपत प्रतिबंधक विभागाची कारवाई

प्रकरणातील तक्रारदार हे ३३ वर्षीय पुरुष विद्युत ठेकेदार असून त्यांची ठेकेदारी फर्म व अहेरी येथे विद्युत साहित्याचे दुकान आहे.तक्रारदार यांच्या मित्राच्या ठेकेदारी फर्मला नगरोत्थान योजना सन २०२५-२६ अंतर्गत मौजा-अहेरी येथील प्रभाग क्र.१ ते १० मध्ये ९ लाख ९३ हजार ९०९ रुपये व प्रभाग क्र.११ ते १७ मध्ये ९ लाख ९३ हजार ८५६ रुपये असे एकूण १९ लाख ८७ हजार ७६५ रुपये किंमतीचे अतिरिक्त सर्व्हिस केबल टाकण्याचे काम मंजूर झाले होते.तक्रारदार यांनी मित्राच्या फर्मसोबत करार करून प्रभाग क्र.११ ते १७ मधील काम पूर्ण केले,तसेच मित्राच्या विनंतीवरून प्रभाग क्र.१ ते १० मधील कामावरही देखरेख ठेवली.दोन्ही कामे विहित १८० दिवसांच्या मुदतीत पूर्ण झाली असून त्यांची संपूर्ण बिले अदा झाली होती.त्यानंतर नगरपंचायत अहेरी येथील नगरसेवक आरोपी अमोल विलासराव गुडेलीवार यांनी सदर कामे जिल्हा नियोजन समिती गडचिरोली येथून स्वतः मंजूर करून आणल्याचे सांगून बिलाच्या रकमेच्या १५ टक्के मोबदला म्हणून ३ लाख रुपये लाचेची मागणी केली.तक्रारदार यांनी ५ ऑगस्ट २०२६ रोजी आरोपीस ३० हजार रुपये रोख दिले होते.त्यानंतर आरोपी उर्वरित २ लाख ७० हजार रुपये लाचेची मागणी करीत असल्याने तक्रारदार यांनी १५ ऑक्टोंबर २०२६ रोजी लाचलुचपत प्रतिबंधक विभाग,गोंदिया येथे तक्रार दिली.त्यानुसार,पंच व व्हॉईस रेकॉर्डरसह तक्रारदार यांना आरोपी अमोल विलासराव गुडेलीवार यांच्या श्रीराम ट्रेडर्स,मुख्य चौक,बस स्टॅण्ड रोड,अहेरी येथील हार्डवेअर दुकानात लाच मागणी पडताळणीसाठी पाठविण्यात आले. त्यावेळी आरोपी यांनी तक्रारदार यांच्याकडे उर्वरित २ लाख ७० हजार रुपये लाचेची मागणी करून,त्यापैकी सध्या उपलब्ध असलेली १ लाख २० हजार रुपयांची रक्कम थोड्या वेळात आणून देण्यास सांगितले. त्यानंतर,तक्रारदार यांना पंच व व्हॉईस रेकॉर्डरसह लाचेची १ लाख २० हजाराची रक्कम घेऊन आरोपीच्या श्रीराम ट्रेडर्स,अहेरी येथील दुकानात पाठविण्यात आले.त्यावेळी आरोपी अमोल विलासराव गुडेलीवार यांनी तक्रारदार यांच्याकडून १ लाख २० हजार रुपये लाचेची रक्कम स्वीकारली. लाचेची रक्कम स्वीकारताच आरोपी यांना पथकाने ताब्यात घेतले. यातील आरोपीचे कृत्य भ्रष्टाचार प्रतिबंध अधिनियम सन १९८८(संशोधन सन २०१८)कलम ७ अन्वये अपराध होत असल्याने सापळा अधिकारी अरविंद राउत,पोलीस निरीक्षक, लाचलुचपत प्रतिबंधक विभाग,गोंदिया यांनी सरकारतर्फे दिलेल्या फिर्यादीवरुन आरोपी विरुध्द पोलीस स्टेशन अहेरी अप.क्र.३६८/२०२६ अन्वये काल,गुरुवार १५ ऑक्टोंबर २०२६ रोजी गुन्हा दाखल करण्यात आला.