उद्रेक न्युज वृत्त
अमरावती :-भरधाव सिटी बसच्या धडकेत एका ९ वर्षीय बालकाचा मृत्यू झाल्याची घटना आज,रविवारी दुपारी अमरावती शहरात घडली आहे.या घटनेत मृत मुलाच्या आजीसह अन्य २ जण गंभीर जखमी झालेत.अमरावती शहरातील सायन्स कोर मैदानालगत ही घटना घडली आहे.प्रीतम गोविंद निर्मळे असे बसखाली चिरडून ठार झालेल्या ९ वर्षीय मुलाचे नाव आहे.
वृत्तानुसार,शिरसगाव कसब्यातील एक ६० वर्षीय नर्मदा निर्मळे या प्रीतम तथा वैष्णवी संजय निर्मळे वय १४ वर्षे व नेहा संतोष निर्मळे या २ नातींसोबत सायन्स कोर्सच्या बस डेपो परिसरातून पायी जात होत्या.रस्त्यात त्यांना एका सीव्हीसी बसने जोराची धडक दिली.ही धडक एवढी जोरात होती की,९ वर्षीय प्रीतमचा बसच्या मागच्या चाकाखाली येऊन जागीच मृत्यू झाला.
या घटनेत नर्मदा निर्मळे यांच्यासह दोन्ही नाती गंभीर जखमी झाल्या आहेत.त्यांच्यावर जिल्हा सामान्य रुग्णालयात उपचार सुरू असून अपघातानंतर संतप्त जमावाने बसची तोडफोड केली.नागरिकांचा रोष लक्षात घेता सायन्सकोर मैदान परिसरात मोठा बंदोबस्त तैनात करण्यात आला.मृत मुलाचा मृतदेह पुढील कारवाईसाठी शासकीय रुग्णालयात पाठवण्यात आला.सध्या परिसरात शांतता असून, पोलिस हा अपघात नेमका कशामुळे झाला? याचा तपास करीत आहेत.
