​देसाईगंज ग्रामीण रुग्णालयात परिचारिकेच्या प्रसंगावधनाने वाचले प्रसूतीपश्चात मातेचे प्राण..

​गडचिरोली :-देसाईगंज ग्रामीण रुग्णालयात एका प्रसूतीपश्चात मातेला हृदयविकाराचा झटका(Cardiac Arrest)आला असता कर्तव्यावर असलेल्या परिचारिकेने अत्यंत कौतुकास्पद कामगिरी करत आणि तत्परतेने सीपीआर(CPR)देऊन मातेचे प्राण वाचवले.या धाडसी कामगिरीमुळे गडचिरोली जिल्ह्यातील एक संभाव्य माता मृत्यू(Maternal Mortality)टळला असून संपूर्ण जिल्ह्यातून या वैद्यकीय चमूवर कौतुकाचा वर्षाव होत आहे.विशेष म्हणजे,देसाईगंज ग्रामीण रुग्णालय येथे यापूर्वी सिझेरियन शस्त्रक्रिया उपलब्ध नव्हती.मात्र,जिल्हा शल्य चिकित्सक डॉ.वर्षा लहाडे यांच्या विशेष मार्गदर्शनाखाली व नियोजनाखाली डॉ.हीना यांची नियुक्ती देसाईगंज येथे करण्यात आली. त्यानंतर या रुग्णालयात दरमहा ५ ते १० सिझेरियन शस्त्रक्रिया यशस्वीपणे पार पडू लागल्या आहेत,ज्यामुळे स्थानिक नागरिकांना मोठा दिलासा मिळाला आहे.

• ​नेमकी घटना काय?

काही दिवसांपूर्वी डॉ.हीना यांनी एका गरोदर महिलेची सिझेरियन(LSCS)शस्त्रक्रिया यशस्वीरित्या पूर्ण केली होती.शस्त्रक्रियेनंतरच्या अवघ्या पाचव्या दिवशी अचानक त्या महिला रुग्णाला तीव्र झटके (Convulsions)आले आणि त्यानंतर काही वेळातच तिचा श्वास व हृदयाचे ठोके थांबले.अशा अत्यंत गंभीर आणि आणीबाणीच्या प्रसंगी,तेथे कार्यरत असलेल्या परिचारिका(Staff Nurse)कविता यांनी कसलाही वेळ न गमावता रुग्णावर उपचार सुरू केले. परिचारिका कविता यांना नामांकित कार्डियाक हॉस्पिटलमध्ये (हृदयविकार रुग्णालय)काम करण्याचा पूर्वानुभव व प्रशिक्षण असल्याने त्यांनी अत्यंत आत्मविश्वासाने रुग्णाला सीपीआर(Cardiopulmonary Resuscitation)देण्यास सुरुवात केली.परिचारिका कविता यांनी कोणत्याही भीतीशिवाय अत्यंत कौशल्याने एकहाती(Single-handedly)रुग्णाला सीपीआर देऊन पुनरुज्जीवित(Revive)केले.रुग्णाची प्रकृती स्थिर (Settle)झाल्यानंतर,वैद्यकीय अधीक्षक डॉ.मिसार आणि डॉ.हीना यांच्या देखरेखीखाली पुढील उपचारासाठी रुग्णाला तात्काळ जिल्हा रुग्णालय गडचिरोली येथे सुरक्षितपणे संदर्भित(Refer)करण्यात आले.

• ​जिल्हा शल्य चिकित्सकांकडून विशेष गौरव👇

या अभिमानास्पद कामगिरीबद्दल बोलतांना जिल्हा शल्य चिकित्सक डॉ.वर्षा लहाडे म्हणाल्या, ​”देसाईगंज ग्रामीण रुग्णालयात डॉ.हीना यांच्या नियुक्तीमुळे आपण सिझेरियन सेवा सुरू करू शकलो,याचा आनंद आहेच. पण परिचारिका कविता यांनी दाखवलेले प्रसंगावधान आणि दिलेले प्रशिक्षण हे कौतुकास पात्र आहे.त्यांनी गडचिरोली जिल्ह्यातील एक माता मृत्यू रोखला आहे. ग्रामीण रुग्णालयाचे वैद्यकीय अधीक्षक डॉ.मिसार, डॉ.हीना आणि विशेषतः परिचारिका कविता यांचे मी मनःपूर्वक अभिनंदन करते.अशा समर्पित कर्मचाऱ्यांमुळेच शासकीय आरोग्य सेवेवरील जनतेचा विश्वास अधिक दृढ होतो.”

​सध्या संबंधित मातेची प्रकृती स्थिर असून तिच्यावर जिल्हा रुग्णालयात तज्ज्ञ डॉक्टरांच्या देखरेखीखाली उपचार सुरू आहेत