गडचिरोली सरपंच संघटनेचा उजळणी प्रशिक्षणास विरोध.. – प्रशासन व अधिकाऱ्यांच्या मर्जीनुसार नियोजन करण्याचा ठपका…

राष्ट्रीय ग्रामस्वराज्य अभियाना अंतर्गत प्रशासन आणि अनेक संस्थांमार्फत सरपंच तथा ग्रामपंचायत कमिटीला विविध प्रकारचे प्रशिक्षण देण्यात येत आहेत.अशातच १५ वा वित्त आयोग व इतर योजने मार्फत ग्रामपंचायती अंतर्गत अनेक कामांचे नियोजन करण्यात येते. मात्र,सरपंच तथा ग्रामपंचायत कमिटीला विश्वासात न घेता प्रशासन व अधिकाऱ्यांच्या मर्जीनुसार नियोजन करण्यात येते.गडचिरोली जिल्हा परिषद व पंचायत समितीच्या निवडणुका न झाल्यामुळे ग्रामपंचायतीचा जिल्हा परिषद व पंचायत समितीला मिळणारा निधी ग्रामपंचायतीला मिळाला नाही.त्यामुळे ग्रामपंचायतींचा विकास खुंटला आहे.सदर प्रशिक्षणामध्ये ग्रामपंचायत अंतर्गत विकास कामे,नियोजन आराखडे तयार करण्याचे प्रशिक्षण दिले जाते.परंतु त्या प्रशिक्षणाचा गावच्या विकासासाठी कुठलाही फायदा होतांना दिसून येत नाही.ग्रामपंचायत अंतर्गत अत्यावश्यक पायाभूत सुविधा दुर्लक्षित होतात.त्यामुळे ग्रामपंचायत कमिटीवर जनतेचा असंतोष निर्माण होऊ लागला आहे.ग्रामपंचायत कमिटीने नियोजन केलेल्या आराखड्याला शासन केराची टोपली दाखवीत आहे; त्यामुळे सरपंच संघटना गडचिरोलीचे पदाधिकारी व सरपंच सदर प्रशिक्षणामध्ये येण्यास इच्छुक नसल्याचे दिलेल्या निवेदनात म्हटले आहे.