गडचिरोली जिल्ह्यातील तब्बल १ लाख ५४ हजार शेतकऱ्यांच्या खात्यात प्रत्येकी दोन हजार रुपये..

गडचिरोली :-अल्पभूधारक शेतकऱ्यांना आर्थिक स्थैर्य देणाऱ्या ‘प्रधानमंत्री किसान सन्मान निधी'(PM-Kisan) योजनेचा २२ वा हप्ता आज,शुक्रवारी प्रधानमंत्री नरेंद्र मोदी यांच्या हस्ते ऑनलाइन पद्धतीने वितरित करण्यात आला.या विशेष कार्यक्रमाचे थेट प्रक्षेपण गडचिरोली येथील कृषी विज्ञान केंद्रात करण्यात आले होते.याप्रसंगी जिल्हा अधिक्षक कृषी अधिकारी प्रीती हिरळकर तसेच जिल्ह्यातील शेतकरी आणि लोकप्रतिनिधी उपस्थित होते.

पीएम किसान योजनेअंतर्गत गडचिरोली जिल्ह्यात डिसेंबर २०२५ ते मार्च २०२६ या कालावधीसाठी देय असलेल्या २२ व्या हप्त्याकरिता एकूण १ लाख ५४ हजार पात्र शेतकरी निश्चित करण्यात आले आहेत. यातील शेतकरी लाभार्थ्यांना प्रत्येकी २,००० रुपये प्रमाणे थेट लाभ हस्तांतरणाद्वारे(DBT)निधी वितरित करण्याची प्रक्रिया राबवण्यात आली.ज्या शेतकऱ्यांचे ई -केवायसी पूर्ण आहे,बँक खाते आधारशी संलग्न आहे आणि भूमी अभिलेख नोंदणी पूर्ण आहे,अशाच पात्र शेतकऱ्यांना या योजनेचा लाभ दर चार महिन्यांनी दिला जातो आणि वर्षाला ६ हजार रुपये वितरीत करण्यात येतात.