गडचिरोली जिल्ह्यात चारा वाहतूक व विक्रीवर बंदी..

गडचिरोली :-जिल्ह्यात पशुधनासाठी चाऱ्याची उपलब्धता कायम राहावी आणि भविष्यात संभाव्य चारा टंचाई निर्माण होऊ नये,यासाठी गडचिरोली जिल्ह्याच्या हद्दीतून इतर जिल्ह्यांत अथवा राज्याबाहेर सर्व प्रकारच्या सुक्या व ओल्या चाऱ्याची वाहतूक आणि विक्री करण्यास बंदी घालण्यात आली आहे.जिल्हाधिकारी तथा जिल्हादंडाधिकारी अविश्यांत पंडा यांनी याबाबत आदेश जारी केला आहे.

सन २०२६ च्या खरीप हंगामात ‘ट्रिगर-१’ लागू झालेल्या राज्यातील २६५ तालुक्यांमध्ये गडचिरोली जिल्ह्यातील गडचिरोली व चामोर्शी या दोन तालुक्यांचा समावेश आहे. या पार्श्वभूमीवर जिल्ह्यात उत्पादित होणारा चारा पशुधनासाठी उपलब्ध राहण्याच्या दृष्टीने हा प्रतिबंधात्मक निर्णय घेण्यात आला आहे.

जिल्ह्यातील चारा विक्रीसाठी इतर जिल्ह्यांत तसेच सीमावर्ती भागात मोठ्या प्रमाणावर पाठविला जाण्याची शक्यता आहे.त्यामुळे भविष्यात जिल्ह्यात चारा टंचाई निर्माण होऊन पशुधनाच्या जीवितास धोका उद्भवू शकतो.त्यातून कायदा व सुव्यवस्थेचा प्रश्न निर्माण होण्याची शक्यताही लक्षात घेऊन जिल्हाधिकाऱ्यांनी भारतीय नागरिक सुरक्षा संहिता, २०२३ च्या कलम १६३ अन्वये प्राप्त अधिकारांचा वापर करून जिल्ह्याच्या महसुली हद्दीत हा आदेश लागू केला आहे.

आदेशानुसार,गडचिरोली जिल्ह्याच्या हद्दीतून इतर कोणत्याही जिल्ह्यात अथवा राज्याबाहेर हिरवा चारा, कडबा,कोणत्याही प्रकारची कुट्टी,पेंढा,टीएमआर तसेच इतर पशुखाद्याची वाहतूक व विक्री करण्यास सक्त मनाई आहे.ही बंदी सर्व प्रकारच्या सुक्या व ओल्या चाऱ्याला लागू राहील.

तथापि,शासकीय योजनांतर्गत होणारी चारा वाहतूक तसेच पशुसंवर्धन विभाग किंवा जिल्हा प्रशासनाने अधिकृत मंजुरी दिलेली चारा वाहतूक या बंदीतून वगळण्यात आली आहे.

या आदेशाचे उल्लंघन करणाऱ्या व्यक्तीविरुद्ध भारतीय न्याय संहिता,२०२३ च्या कलम २२३ अन्वये कायदेशीर कारवाई करण्यात येईल.सदर आदेश पुढील आदेश निर्गमित होईपर्यंत अंमलात राहील, असे जिल्हाधिकारी तथा जिल्हादंडाधिकारी अविश्यांत पंडा यांनी कळविले आहे.