आता शासकीय धान खरेदी केंद्रावरील भोंगळ कारभार बंद; धान विक्रीची होणार पडताळणी..!

उद्रेक न्युज वृत्त :-शेतकऱ्यांना हमीभावापेक्षा कमी दर मिळू नये,यासाठी शासन जिल्हा मार्केटिंग फेडरेशन आणि आदिवासी विकास महामंडळाच्या शासकीय धान खरेदी केंद्रावर धान खरेदी करते.शेतकऱ्यांना शासकीय धान खरेदी केंद्रावर धानाची विक्री करण्यासाठी शासनाच्या बीम पोर्टलवर ऑनलाइन नोंदणी करावी लागते.ऑनलाइन नोंदणी केलेल्या शेतकऱ्यांकडूनच धान खरेदी केली जाते. पण,मागील काही कालावधीत बोगस शेतकरी तसेच शेतकऱ्यांच्या नावावर ऑनलाइन नोंदणी करून काही व्यापाऱ्यांनी धानाची विक्री केल्याचे प्रकार उघडकीस आले.त्यामुळे या प्रकाराला पूर्णपणे आळा घालण्यासाठी शासनाने २०२५-२६ म्हणजेच यावर्षीपासून नोंदणी करणाऱ्या शेतकऱ्यांचा अंगठा थंब मशीनवर घेण्याची प्रक्रिया सुरू केली आहे.या थंबवरील अंगठ्याची शेतकरी प्रत्यक्ष धान खरेदी केंद्रावर धानाची विक्री करण्यासाठी गेल्यानंतर पडताळणी करूनच धान खरेदी केली जाणार असल्याची माहिती आहे.यासाठी सर्व शासकीय धान खरेदी केंद्रांना जिल्हा मार्केटिंग फेडरेशनच्या माध्यमातून थंब मशीन उपलब्ध करून दिले जाणार आहेत.त्यातच,दरवर्षी दिवाळीपूर्वी शासकीय धान खरेदीला सुरुवात होते.पण,यंदा शासनाने धान खरेदीचे आदेश उशिराने काढले.शासकीय धान खरेदी केंद्रावर धानाची विक्री करण्यासाठी शेतकऱ्यांना धान खरेदी केंद्रावरून नोंदणी करता येणार आहे.तर येत्या १५ नोव्हेंबरपासून शासकीय धान खरेदीला सुरुवात होणार आहे.