उद्रेक न्युज वृत्त :- छत्तीसगडमधील कांकेर जिल्ह्यात सुरक्षा दल आणि नक्षलवाद्यांमध्ये काल, मंगळवारी मोठी चकमक झाली.या चकमकीत २९ नक्षल्यांना कंठस्नान घालण्यात आले असून अनेक नक्षली जखमी झाले आहेत.या चकमकीत तीन जवानही जखमी झाले. बस्तर विभागाचे पोलिस महानिरीक्षक सुंदरराज पी यांनी सांगितले की,जिल्ह्यातील छोटाबेठिया पोलिस स्टेशन हद्दीतील बिनागुंडा आणि कोरोनार गावांदरम्यान हपतोला गावाच्या जंगलात ही चकमक झाली.चकमकीत मारले गेलेले शंकर राव आणि ललिता हे डीव्हीसी दर्जाचे नक्षलवादी नेते होते. या दोघांवर २५-२५ लाखांचे बक्षीस जाहीर करण्यात आले होते.माओवाद्यांच्या उत्तर बस्तर विभागातील शंकर,ललिता,राजू आणि इतर नक्षलवाद्यांच्या उपस्थितीची माहिती सुरक्षा दलांना मिळाली होती. या माहितीनंतर बीएसएफ आणि डीआरजीचे संयुक्त पथक छोटाबेठिया पोलिस स्टेशन परिसरात गस्तीसाठी पाठवण्यात आले.हे पथक हापटोला गावाच्या जंगलात असताना नक्षलवाद्यांनी सुरक्षा दलांवर गोळीबार केला.यानंतर सुरक्षा दलांनीही त्यांना तडाखेबंद प्रत्युत्तर दिले.
कांकेर जिल्हा कांकेर लोकसभा मतदारसंघात येतो जेथे २६ एप्रिल रोजी सार्वत्रिक निवडणुकीच्या दुसऱ्या टप्प्यात मतदान होणार आहे.अशा परिस्थितीत त्याआधी ही धडाकेबाज मोहीम झाल्याने सुरक्षा दलांचे कौतुक करण्यात येत आहे.नक्षल्यांकडून ७ एके ४७ रायफल,१ इन्सास रायफल आणि एसएलआर रायफल, उएलएमजी आणि ३०३ बंदुकांसह मोठ्या प्रमाणात शस्त्रसाठा जप्त करण्यात आला आहे.सुरक्षा दल आणि नक्षलवाद्यांमध्ये अधूनमधून गोळीबार सुरू होता.
