अचानक समोर आलेल्या कारला दुचाकीची धडक; तरुणाचा मृत्यू..

गडचिरोली :-शहरात भीषण अपघाताची घटना घडून एका २० वर्षीय दुचाकी चालक तरुणाचा रुग्णालयात उपचारादरम्यान मृत्यू झाला; तर सहकारी तरुण गंभीर जखमी झाल्याची घटना काल सोमवारच्या सायंकाळी सहा वाजेच्या दरम्यान गडचिरोली शहराच्या मूल मार्गावरील महिला महाविद्यालयाजवळ घडली.सुजल सुरेश तागडे वय २० वर्षे,रा.आनंदनगर,गडचिरोली असे अपघातात मृत पावलेल्या तरुणाचे नाव आहे.तर प्रज्ज्वल बाळकृष्ण पेंदाम वय १९ वर्षे,रा.फरी,ता. कुरखेडा,जि.गडचिरोली असे अपघातात गंभीर जखमी झालेल्या तरुणाचे नाव आहे.

सोमवारच्या सायंकाळी दोघेही तरुण काही कामानिमित्त त्यांच्या दुचाकीने गडचिरोली शहराच्या कॉम्प्लेक्स एरिया परिसरातून शहराच्या मुख्य चौकाकडे इंदिरा गांधी चौकात जाण्यासाठी निघाले होते.मार्गावरून जात असतांनाच मूल मार्गावरील महिला महाविद्यालयाजवळ एक कार वळण घेत होती.दरम्यान,भरधाव वेगात असलेली दुचाकी वळण घेणाऱ्या कारला जाऊन जोरात धडकली.यात दोघेही तरुण दुचाकीवरून उसळून पडले. दोघांनाही गंभीर मार लागल्याने त्यांना तात्काळ गडचिरोली जिल्हा सामान्य रुग्णालयात दाखल करण्यात आले.रुग्णालयात उपचार सुरू असतांनाच सुजलचा मृत्यू झाला.तर प्रज्ज्वल पेंदाम याचेवर उपचार सुरू आहेत. घटनेचा पुढील तपास गडचिरोली पोलिस प्रशासन करीत आहे.