उद्याला गडचिरोलीत ‘महा वॉकेथॉन-वॉक फॉर वॉटर’; नागरिकांनी सहभागी होण्याचे आवाहन..

गडचिरोली :-जलसंवर्धनाचे महत्त्व नागरिकांपर्यंत पोहोचविण्यासाठी उद्या,शुक्रवार २१ ऑगस्ट रोजी ‘महा वॉकेथॉन-वॉक फॉर वॉटर’ या उपक्रमाचे आयोजन करण्यात आले आहे.या उपक्रमात विद्यार्थी,युवक, शासकीय अधिकारी,कर्मचारी तसेच नागरिकांनी मोठ्या संख्येने सहभागी होऊन जलसंवर्धनाचा संदेश व्यापक स्तरावर पोहोचवावा, असे आवाहन जिल्हाधिकारी अविश्यांत पंडा यांनी केले आहे.

महा वॉकेथॉनच्या पूर्वतयारीचा आढावा जिल्हाधिकारी अविश्यांत पंडा यांनी जिल्हाधिकारी कार्यालयात आयोजित बैठकीत घेतला.यावेळी मृद व जलसंधारण विभागाच्या अधिकाऱ्यांनी कार्यक्रमाच्या नियोजनाची रूपरेषा सादर केली.कार्यक्रमात सहभागी होणाऱ्या विद्यार्थी व नागरिकांच्या सुरक्षिततेसह सर्व आवश्यक व्यवस्था चोख ठेवून कार्यक्रम यशस्वी करण्याचे निर्देश जिल्हाधिकाऱ्यांनी संबंधित विभागांना दिले.

कार्यक्रमाची सुरुवात उद्या २१ ऑगस्ट रोजी सकाळी ६ वाजता इंदिरा गांधी चौक येथून होणार असून सुमारे तीन किलोमीटर अंतराची ही वॉकेथॉन जिल्हा क्रीडा संकुल,पोटेगाव रोड,गडचिरोली येथे पूर्ण होईल. त्यानंतर त्याच ठिकाणी विजेत्यांना पुरस्कार वितरण करण्यात येणार आहे.

कार्यक्रमाच्या सुरक्षित व सुरळीत आयोजनासाठी पोलीस विभागाचे सहकार्य घेण्याच्या सूचना जिल्हाधिकारी पंडा यांनी दिल्या.तसेच अग्निशमन वाहनाची व्यवस्था ठेवावी आणि सहभागी विद्यार्थ्यांना कोणत्याही प्रकारची अडचण निर्माण होणार नाही,याची विशेष दक्षता घ्यावी,असेही त्यांनी सांगितले.संबंधित विभागांनी परस्पर समन्वयातून आपापल्या जबाबदाऱ्या पार पाडण्याच्या सूचना यावेळी देण्यात आल्या.

‘पाणी अडवा,पाणी जिरवा,जलयुक्त महाराष्ट्र घडवा’ हे या उपक्रमाचे घोषवाक्य आहे.महा वॉकेथॉनच्या माध्यमातून पाणी बचत,जलसंधारण आणि उपलब्ध जलस्रोतांच्या योग्य वापराबाबत जनजागृती करण्यात येणार आहे.कार्यक्रमातील सहभागींना टी-शर्ट,कॅप, बॅज तसेच ई-प्रमाणपत्र देण्यात येणार आहे.

• रील्स स्पर्धेचेही आयोजन👇

महा वॉकेथॉनच्या अनुषंगाने मृद व जलसंधारण विभागामार्फत रील्स स्पर्धेचे आयोजन करण्यात आले आहे.स्पर्धेसाठी रील अपलोड करण्याचा कालावधी १५ ते २१ ऑगस्ट २०२६ असा आहे.या स्पर्धेच्या माध्यमातूनही जलसंवर्धनाचा संदेश अधिकाधिक नागरिकांपर्यंत पोहोचविण्यात येणार आहे.

जलसंवर्धनाबाबत व्यापक लोकसहभाग निर्माण करण्याच्या उद्देशाने आयोजित ‘महा वॉकेथॉन-वॉक फॉर वॉटर’मध्ये नागरिक,विद्यार्थी,युवक तसेच विविध विभागांतील अधिकारी व कर्मचाऱ्यांनी QR कोड स्कॅन करून स्पर्धेत मोठ्या संख्येने सहभागी व्हावे, असे आवाहन करण्यात आले आहे.

बैठकीला मृद व जलसंधारण विभागाचे कार्यकारी अभियंता राजेंद्र कोठेकर व विविध विभागांचे विभागप्रमुख व संबंधित अधिकारी उपस्थित होते.