उद्याला शिक्षकांचे शाळा बंद आंदोलन; शिक्षकांच्या प्रश्नांकडे वेधणार लक्ष..

उद्रेक न्युज वृत्त :-शिक्षकांचे राज्य स्तरावर प्रलंबीत प्रश्न निकाली काढण्याच्या मागणीसाठी महाराष्ट्र राज्य प्राथमिक शिक्षक मध्यवर्ती संघटना,शिक्षक संघटना समन्वय समिती,महाराष्ट्र राज्य प्राथमिक शिक्षक समिती, महाराष्ट्र टीईटी-सीटीईटी उत्तीर्ण शिक्षक कृती समिती, महाराष्ट्र राज्य खासगी शाळा शिक्षक संघटना,शैक्षणिक व्यासपीठ,मुख्याध्यापक संघ व अन्य समविचारी शिक्षक संघटनांच्या संयुक्त विद्यमाने उद्या,गुरूवार ९ जुलै रोजी राज्यभर शाळा बंद आंदोलनाची हाक देण्यात आली आहे.या दिवशी राज्याच्या विविध जिल्ह्यातील सर्व प्राथमिक शिक्षक एक दिवसाची सामूहीक रजा घेत धरणे,नारे-निदर्शने व सत्याग्रह आंदोलन करणार आहेत.टीईटीची सक्ती रद्द करणे,१५ मार्च २०२४ चा संचमान्यते बाबतचा शासन निर्णय रद्द करणे,पदोन्नती प्रक्रीयेतील अडथळे दूर करणे,बीएलओसह अशैक्षणिक कामाची सक्ती न करणे,जुनी पेंशन लागू करणे यांसह शिक्षकांच्या विविध मागण्यांकडे शासनाचे लक्ष वेधण्यासाठी शिक्षकांनी रस्त्यावर उतरण्याचा निर्णय घेतला.मागील दोन वर्षांपासून शिक्षक अशैक्षणिक व ऑनलाईन कामाने त्रस्त आहेत.त्यामुळे शिक्षकांमध्ये मोठ्या प्रमाणात असंतोष असून शिक्षकवर्गात संतापाची लाट पसरली आहे.