भीषण अपघात.. चारचाकी वाहन व दुचाकीची समोरासमोर धडक.. – पतीचा जागीच मृत्यू तर पत्नी गंभीर जखमी..

गडचिरोली :-शहरात आज,गुरुवार १९ मार्च रोजी भीषण अपघाताची घटना घडून दुचाकीस्वार पतीचा जागीच मृत्यू झाला,तर पाठीमागे दुचाकीवर बसलेली पत्नी गंभीर जखमी झाली.सदरची घटना आज दुपारी दीड वाजेच्या सुमारास गडचिरोली शहराच्या चामोर्शी मार्गावरील समतानगर(कैकाडी वस्ती)समोर घडली. हेमंत देवनाथ शेंडे वय ४५ वर्षे,रा.औंधी,जि.मानपूर, छत्तीसगड,हल्ली मुक्काम समतानगर,गडचिरोली असे अपघातात मृत पावलेल्या पतीचे नाव आहे,तर नीतू हेमंत शेंडे वय ३६ वर्षे असे अपघातात गंभीर जखमी झालेल्या पत्नीचे नाव आहे.

हेमंत शेंडे व त्यांची पत्नी नीतू शेंडे हे दोघेही दुचाकीने समतानगर येथे जाण्यासाठी निघाले होते.समतानगर समोरील मार्गावर येताच त्यांनी उजवीकडे वळण घेत असतांनाच चामोर्शीकडून गडचिरोली शहराकडे येणाऱ्या चारचाकी स्कार्पिओ वाहनाची दुचाकीला समोरासमोर जोरदार धडक बसली.यात दुचाकीवरील  हेमंत शेंडे यांनी जागीच प्राण सोडला.तर पत्नी नीतू शेंडे गंभीर जखमी होऊन त्यांच्या पायाला मार लागला.विशेष म्हणजे, अपघात घडताच गडचिरोली येथील ३१ वर्षीय स्कार्पिओ चालक सुधीर भुरले यांनी घटनास्थळावरून पळून न जाता सर्वप्रथम जखमी महिलेची मदत करून त्यांना उपचारार्थ रुग्णालयात दाखल केले व अपघाताची माहिती स्वतः गडचिरोली पोलिसांना दिली.