गावकऱ्यांचा सरपंचाला दे धक्का; सरपंच पदावरून हटवले..

गोंदिया :-विकास कामे करतांना सदस्यांना डावलणे, कामांसाठी पैशांची मागणी करणे,शासकीय जमिनीचे बेकायदेशीर प्लॉटिंग करून आर्थिक व्यवहार करणे,

वकिली पेशाचा धाक दाखवून गावकऱ्यांना धमकावणे आणि विरोधात बोलणाऱ्यांवर ॲट्रॉसिटी कायद्यांतर्गत गुन्हे दाखल करण्याची भीती दाखवून पदाचे वर्चस्व दाखविणाऱ्या थेट सरपंचास गावकऱ्यांनी घरचा रस्ता दाखविल्याची घटना गोंदिया जिल्ह्याच्या आमगाव तालुक्यातील खुर्शिपार ग्रामपंचायतीत उघडकीस आली. यामुळे गेल्या काही दिवसांपासून सुरू असलेल्या राजकीय सत्तानाट्याचा अखेर धक्कादायक अंत झाला आहे.सरपंच हेमलता चव्हाण यांच्याविरुद्ध मांडण्यात आलेला अविश्वास ठराव तब्बल ६६० विरूध्द शून्य अशा ऐतिहासिक फरकाने मंजूर झाला आहे.विशेष म्हणजे, सभेला उपस्थित असलेल्या एकाही मतदाराने सरपंचांच्या बाजूने मतदान केले नाही,ज्यामुळे चव्हाण यांना आपले पद गमवावे लागले आहे.सोमवार १९ जानेवारी २०२६ रोजी ग्रामपंचायत सदस्य आणि उपसरपंचांनी सरपंचांच्या कार्यपद्धतीवर तीव्र नाराजी व्यक्त करत जिल्हाधिकाऱ्यांकडे अविश्वास प्रस्ताव सादर केला होता.तहसीलदारांच्या उपस्थितीत आयोजित करण्यात आलेल्या विशेष ग्रामसभेत गावकऱ्यांनी आपला रोष मतदानातून व्यक्त केला.प्रकरणी सरपंच हेमलता चव्हाण यांनी सर्व आरोप फेटाळून लावले आहेत.आपल्यावर अन्याय होत असून जातीपातीचे राजकारण केले जात असल्याचा दावा त्यांनी केला होता. मात्र, ‘गावकरी ते राव न करी’ याप्रमाणे गावकऱ्यांनी रोष व्यक्त करून सरपंचाला पदावरून हटवले आहे.