आज तीन नक्षलवाद्यांचा खात्मा; एका महिला नक्षलीचा समावेश..

उद्रेक न्युज वृत्त :-छत्तीसगड राज्याची नक्षल मुक्तिकडे वाटचाल सुरू असून नुकतेच १६ डिसेंबर रोजी बीजापूर जिल्ह्यात तब्बल ३४ नक्षलवाद्यांनी आत्मसमर्पण करून जंगलो-पहाडातील नक्षली जीवन सोडून सामान्य जीवन जगण्याचा निर्धार केला.अश्यातच आज,गुरुवार १८ डिसेंबरच्या पहाटे उडालेल्या चकमकीत तीन नक्षलवादी ठार झाले असून यात एका महिला नक्षलीचा समावेश आहे.सदरची चकमक ही छत्तीसगडच्या सुकमा जिल्ह्यातील गोलापल्ली परिसरातील जंगल व डोंगराळ भागात उडाली.यात सोढी बंडी,माडवी जोगा उर्फ मुन्ना व महिला नक्षली नुप्पो बजनी अशी खात्मा करण्यात आलेल्या नक्षलवाद्यांची नावे असून तिघांवर १५ लाख रुपयांचे बक्षीस जाहीर करण्यात आले होते.गोलापल्ली परिसरातील जंगल व डोंगराळ भागात नक्षलवादी दबा धरून बसल्याची माहिती मिळताच आज गुरुवारी पहाटेच्या सुमारास जिल्हा राखीव दल(डीआरजी) शोधमोहीम राबवित असतांना नक्षलवाद्यांनी सुरक्षा दलावर गोळीबार सुरू केला.सुरक्षा दलांनी त्यास जोरदार प्रत्युत्तर दिले.सकाळपासून दोन्ही बाजूंनी अधूनमधून गोळीबार सुरू होता.यात तीन नक्षलवादी ठार झाले. चकमकीनंतर गोलापल्ली आणि आसपासच्या जंगल परिसरातील डोंगराळ भागात सुरक्षा व्यवस्था कडक करण्यात आली आहे.