हैवान बापाने चार वर्षीय चिमुकलीची साडीने गळफास लावून केली हत्या.. – चिमुकलीने चॉकलेटसाठी मागितले होते पैसे..

लातूर :-जिल्ह्याच्या उदगीर तालुक्यातील भीमातांडा येथे दारूच्या आहारी गेलेल्या एका हैवान बापाने आपल्याच चार वर्षीय चिमुकलीची राहत्या घरी साडीने गळफास लावून हत्या केल्याची धक्कादायक घटना आज,रविवार २९ जून रोजी दुपारच्या सुमारास उघडकीस आली. आरुषी बालाजी राठोड असे मृत चार वर्षीय चिमुकलीचे नाव असून तिने केवळ चॉकलेट खाण्यासाठी बापाकडे पैसे मागितले होते.

भीमातांडा येथील आरोपी बालाजी बाबु राठोड हा दारूच्या आहारी गेला होता.त्यामुळे तो सतत दारू पिऊन पत्नीशी भांडण तसेच तिला मारहाण करायचा. दररोज होणाऱ्या त्रासापायी पत्नी मुलीसह काही दिवसांपूर्वी माहेरी निघून गेली होती.त्यामुळे आरोपी बालाजी हा काही दिवसांपूर्वी सासरी गेला होता व मुलीला आपल्याकडे घेऊन आला होता.बालाजी हा काही कामानिमित्त बाहेर गेल्यावर मुलीला त्याच्या  आईजवळ सोडत असे.अश्यातच आज रविवारी दुपारच्या सुमारास मुलीने चॉकलेट खाण्यासाठी पैसे मागितले आणि रडायला सुरुवात केली.त्यामुळे चिडलेल्या हैवान बापाने स्वतःच्याच चार वर्षीय चिमुकलीचा राहत्या घरीच घरातील साडीने गळा आवळला व गळफास लावून हत्या केली.प्रकरणी त्याच्या पत्नीने ग्रामीण पोलिसात दिलेल्या फिर्यादीवरून खुनाचा गुन्हा दाखल करण्यात आला आहे.त्यानुसार हैवान आरोपीला अटक करण्यात आली असून घटनेचा अधिक तपास पोलीस उपनिरीक्षक सावित्रा रायपल्ले करीत आहेत.