आता बँक खाते साफ करण्याचा नवा फंडा; लिंक नाही तर सुंदर तरुणीच्या फोटोचा वापर..

उद्रेक न्युज वृत्त :-सायबर चोरट्यांकडून फसवणुकीचे नवनवे फंडे समोर येत असून,अशाच प्रकारे आणखी एक नवा फंडा समोर आला आहे.पूर्वी मोबाइलवर लिंक पाठवून बँक खाते रिकामे केले जात होते; परंतु,आता लिंकऐवजी एखाद्या सुंदर तरुणीचा फोटो मोबाइलवर पाठवून तुमचे बँक खाते रिकामे केले जात आहे.यापासून खबरदारी घेण्याचे आवाहन सायबर पोलिसांकडून केले जात आहे.

मोबाइलची क्रांती झाल्यापासून घरबसल्या लाखो रुपये लोकांच्या खात्यातून क्षणात गायब होऊ लागले आहेत.नागरिकांच्या अज्ञानाचा तसेच बेसावधपणाचा गैरफायदा घेऊन सायबर चोरटे नवनवे फंडे आत्मसात करीत आहेत.पूर्वी तुमचे एटीएम बंद पडले आहे, तुमच्या बँक खात्याची केवायसी करायची आहे,अशी

एक ना अनेक कारणे सांगून ओटीपी घेतला जात होता.कालांतराने हा फसवणुकीचा फंडा मागे पडला. यानंतर मोबाइलवर एखादी लिंक पाठवून संबंधिताने लिंक ओपन केल्यानंतर क्षणात संबंधिताचे बँकेचे अकाउंट रिकामे होत होते.अशा फसव्या लिंक ओपन केल्यानंतर आपले पैसे गायब होतात.हे नागरिकांच्या लक्षात येऊ लागल्यानंतर सायबर चोरट्यांनी ‘डिजिटल अरेस्ट’ चा नवा फंडा समोर आणला आहे.अशातच आता सायबर चोरटे मोबाइलधारकांच्या मोबाइलवर विशेषतः रात्री ११ नंतर सायबर चोरटे सुंदर तरुणीचा फोटो पाठवत आहेत.हा फोटो पुरुष नक्कीच ओपन करून पाहणार,अशी मानसिकताही सायबर चोरट्यांनी ओळखली आहे.त्यामुळे ही रात्रीची वेळ चोरट्यांनी फोटो पाठविण्यासाठी निवडली आहे,असे पोलिस सांगताहेत. त्यामुळे अनोळखी व्यक्तीच्या मोबालइवरून अशा प्रकारचा फोटो आल्यास तो फोटो डाउनलोड न करता तातडीने डीलीट करा. कोणालाही फॉरवर्ड करू नका.चॅटिंग तसेच व्हिडीओ कॉलिंग करू नका.अशा अनोळखी व्यक्तीला मुळात प्रतिसाद देऊ नका.