आज गडचिरोली जिल्ह्यात १० उमेदवारांचे १३ नामनिर्देशन अर्ज दाखल.. – आरमोरी विधानसभा मतदारसंघातून कृष्णा गजबेंनी दाखल केला अर्ज…

गडचिरोली :- सार्वत्रिक विधानसभा निवडणूक २०२४ साठी गडचिरोली जिल्ह्यात आज,सोमवारी उमेदवारांकडून एकूण १३ अर्ज दाखल करण्यात आले आहेत.आरमोरी (अ.ज.)या विधानसभा मतदारसंघात दोन उमेदवारांनी तीन नामनिर्देशनपत्र दाखल केले यात कृष्णा दामाजी गजबे (भारतीय जनता पार्टी) यांनी दोन तर प्रा.रमेश गोविंदा मानागडे (अपक्ष) यांनी एक अर्ज दाखल केला आहे.

गडचिरोली (अ.ज.)या विधानसभा मतदारसंघात सहा नामनिर्देशन पत्र दाखल झाले.यात भरत मंगरूजी येरमे (वंचित बहुजन आघाडी) यांनी दोन अर्ज दाखल केले तर बाळकृष्ण वंगणुजी सावसाकडे (अपक्ष), डॉ. मिलिंद रामजी नरोटे (भारतीय जनता पार्टी),जयश्री विजय वेळदा (भारतीय शेतकरी आणि कामगार पक्ष), मनोहर तुळशिराम पोरेटी (इंडियन नॅशनल काँग्रेस) यांनी उमेदवारी अर्ज दाखल केले.

अहेरी (अ.ज.)विधानसभा मतदारसंघात आज चार नामनिर्देशन पत्र दाखल झाले.यात हनमंतू गंगाराम मडावी यांनी भारतीय राष्ट्रीय काँग्रेस पक्ष व अपक्ष असे दोन नामनिर्देशनअर्ज भरले.तसेच आत्राम भाग्यश्री धर्मरावबाबा (नॅशनालिस्ट काँग्रेस पार्टी, शरदचंद्र पवार गट) व राजे अम्ब्रीशराव राजे सत्यवानराव आत्राम (अपक्ष) यांनी नामांकन अर्ज दाखल केले आहेत.

जिल्ह्यात आजपर्यंत १५ उमेदवारांकडून एकूण १९ नामनिर्देशन पत्र दाखल झाले आहेत.

आज २८ ऑक्टोंबर रोजी आरमोरी विधानसभा मतदारसंघातून ५ व्यक्तींनी १२ नामनिर्देशन अर्जाची उचल केली तर गडचिरोली विधानसभा मतदार संघातून २ व्यक्तींनी ५ अर्जाची आणि अहेरी मतदारसंघातून ९ व्यक्तींकडून १० अर्जाची उचल करण्यात आली आहे.जिल्ह्यात आज २८ तारखे पर्यंत  एकूण २१३ नामनिर्देशन अर्जाची उचल करण्यात आली आहे.

महाराष्ट्र विधानसभा सार्वत्रिक निवडणुकीची आदर्श आचारसंहिता १५ ऑक्टोंबर २०२४ पासून लागू झाली असून २२ ऑक्टोंबर २०२४ रोजी निवडणूक अधिसूचना प्रसिद्ध करण्यात आली. नामनिर्देशन पत्र भरणे सुरु असून उद्या २९ ऑक्टोंबरला नामनिर्देशन पत्र भरण्याची शेवटची तारीख आहे.अर्जांची छाननी ३० ऑक्टोंबरला करण्यात येणार असून ४ नोव्हेंबर २०२४ रोजी अर्ज मागे घेता येईल.मतदान २० नोव्हेंबरला होत असून २३ नोव्हेंबर २०२४ रोजी मतमोजणी होणार आहे.