मतदार बंधूंनो आक्षेप घेतांना सावधान..! आक्षेप खोटे ठरले तर मतदाराला सहा महिने कारावास व १ हजार रुपये दंडाची शिक्षा…

उद्रेक न्युज वृत्त :-व्हीव्हीपॅट म्हणजे ‘व्होटर व्हेरिफाइड पेपर ऑडिट ट्रेल’, एखाद्या मतदाराने ज्या उमेदवाराला मतदान केले आहे; खरचं त्याच उमेदवाराला मत गेले की नाही; याची खातरजमा करण्यासाठी मतदान केंद्रांमध्ये व्हीव्हीपॅट मशीनचा वापर करण्यात येतो.परंतु एखाद्या मतदाराने यावर आक्षेप घेतला आणि ते खोटे ठरले तर अशा मतदाराला सहा महिने कारावास आणि १ हजार रुपये दंडाची तरतूद निवडणूक आयोगाने केलेली आहे.त्यामुळे मतदार बंधूंनो आक्षेप घेतांना सावधान..! अन्यथा ते अंगलट येऊ शकते.

विधानसभा निवडणुकीसाठी येत्या २० नोव्हेंबर रोजी प्रत्यक्ष मतदान पार पडणार आहे.त्यासाठी सर्व विधानसभा मतदारसंघांतील प्रत्येक मतदान केंद्रांवर व्हीव्हीपॅट मशीनचा वापर करण्यात येणार आहे. सर्वसामान्य नागरिकांची निवडणूक प्रक्रियेवरील विश्वासार्हता वाढावी आणि ईव्हीएम मशीनबद्दल सर्वसामान्य माणसाच्या मनातील संशय दूर करण्यासाठी मतदाराने ईव्हीएम मशीनवर त्याच्या पसंतीच्या उमेदवाराच्या नावासमोरचे बटन दाबल्यानंतर त्याचे मत त्याच उमेदवाराला गेले की नाही,याची पडताळणी करण्यासाठी व्हीव्हीपॅट मशीनचा वापर करण्यात येतो.यात उमेदवाराच्या नावासमोरचे बटन दाबल्यानंतर त्याचवेळी उमेदवाराचे नाव,क्रमांक आणि चिन्ह यांचा उल्लेख असलेली व्हीव्हीपॅट स्लिप मशीनमध्ये सात सेकंदापर्यंत मतदाराला दिसते.त्यानंतर आपोआप ती स्लीप कट होऊन बीप वाजतो आणि ती स्लीप सीलबंद पेटीत जमा होते.परंतु एखाद्या मतदाराला आपण ज्या उमेदवाराला मतदान केले,त्या उमेदवाराऐवजी वेगळ्याच उमेदवाराची चिठ्ठी मशीनमध्ये दिसली अशी शंका आल्यास असा मतदार आक्षेप घेऊ शकतो.आक्षेप खरा ठरला तर मतदान थांबविले जाते.आणि जर आक्षेप खोटा ठरला तर त्या मतदारावर कार्यवाही केली जाणार आहे.