भामरागड तालुक्याच्या जहाल नक्षलवाद्यास जंगल परिसरातून अटक..!

गडचिरोली :-जिल्ह्याच्या भामरागड तालुक्यातील परायणार गावाचा रहिवासी असलेल्या एका ३२ वर्षीय जहाल नक्षलवाद्यास जवानांनी भामरागड तालुक्याच्या तिरकामेटाच्या जंगल परिसरातून अटक केली आहे. काल,शनिवारी विशेष अभियान पथकातील जवान नक्षलविरोधी अभियान राबवीत असतांनाच ताडगाव पोलिस ठाण्याच्या हद्दीत असणाऱ्या तिरकामेटा जंगल परिसरात एक संशयित व्यक्ती आढळून आला.त्यास ताब्यात घेऊन अहेरी येथील प्राणहिता पोलिस उपमुख्यालयात नेऊन चौकशी केली असता,चौकशीअंती तो शंकर भिमा महाका वय ३२ वर्षे,रा.परायणार, ता.भामरागड,जि.गडचिरोली येथील असून भामरागड दलमचा सदस्य असल्याचे निष्पन्न झाले.तो घातपात करण्याच्या उद्देशाने जंगल परिसरात रेकी करीत असल्याचेही स्पष्ट झाले.२१ जानेवारी २०२२ रोजी भामरागड तालुक्यातील धोडराज-इरपणार मार्गावरील पेनगुंडा रस्त्याच्या कामावरील दोन कोटी रुपये किंमतीच्या १९ वाहनांची जाळपोळ नक्षल्यांनी केली होती.याप्रकरणी लाहेरी पोलिस ठाण्यात दाखल गुन्ह्यात शंकर महाकाला अटक करण्यात आली होती.शंकर महाका हा २०१६ पासून २०२२ पर्यंत नक्षल्यांच्या जनमिलिशियामध्ये कार्यरत होता.त्यानंतर तो भामरागड दलमचा सदस्य झाला.सदरची कारवाई नक्षलविरोधी अभियानाचे विशेष पोलिस महानिरीक्षक संदीप पाटील, पोलिस उपमहानिरीक्षक अंकित गोयल,गडचिरोली पोलिस अधीक्षक नीलोत्पल,अप्पर पोलिस अधीक्षक (अभियान)एम.रमेश,अप्पर पोलिस अधीक्षक (प्राणहिता)सत्यसाई कार्तिक,पोलिस उपअधीक्षक (अभियान)विशाल नागरगोजे व भामरागडचे प्रभारी उपविभागीय पोलिस अधिकारी अजय कोकाटे यांच्या मार्गदर्शनात करण्यात आली.