उद्रेक न्युज वृत्त
नागपूर :-राज्यमार्गावरून वाहणाऱ्या नांद-चिखलापार नदीला आलेल्या पुरात ट्रकसह चालक व क्लीनर असे दोघे वाहून गेलेत.काल,रविवारी सायंकाळी ४:४० वाजेच्या सुमारास ही घटना घडली.जीवनमृत्यूचा हा थरार तब्बल पाच मिनिटे चालला असून घटनेचा २ मिनीट १२ सेकंदांचा व्हिडीओसुद्धा आता समोर आला आहे.
गत २४ तासांपासून नागपूर जिल्ह्याच्या भिवापूर तालुक्यात संततधार पाऊस सुरू असून नदीनाल्यांना आलेल्या पुरामुळे वाहतूक ठप्प आहे.अशातच सायंकाळी ४:४० वाजेच्या सुमारास उमरेडवरून हिंगणघाटकडे जात असलेला एक ट्रक नांद-चिखलापार नदीच्या पुलावरून वाहत गेला.यावेळी उपस्थित नागरिकांनी चालक व क्लीनर या दोघांनाही ट्रकसह पुराच्या पाण्यातून प्रवास करण्यास मज्जाव केला.मात्र, चालकाने त्याकडे दुर्लक्ष करीत,मार्गावरून वाहत असलेल्या पाण्यात ट्रक टाकला.बघता-बघता हा ट्रक काही अंतरावरच मार्ग सोडून पाण्याच्या प्रवाहात लागला. यावेळी सुद्धा नागरिकांनी चालक व क्लीनरला ट्रकमधून बाहेर पडण्याचे आवाहन केले. त्यानंतरही चालक ट्रक चालवीत राहिला.दरम्यान पुलावर पाण्याचा प्रवाह अधिक असल्यामुळे ट्रकसह चालक व क्लीनर वाहून गेले.माहिती मिळताच उपविभागीय अधिकारी विद्यासागर चौहान, तहसीलदार कल्याणकुमार डहाट,ठाणेदार प्रमोद घोंगे, ठाणेदार अजीत कदम घटनास्थळी पोहोचले.माजी आ.सुधीर पारवे व माजी आ.राजू पारवे हेसुद्धा यावेळी उपस्थित होते.
उपस्थित नागरिकांनी ट्रक चालकाला पुढे न जाण्याचा सल्ला दिला.मात्र,चालकाने कुणाचे काही ऐकले नाही. लागलीच एक मिनिटानंतर ट्रक पुराच्या पाण्यातून रस्ता सोडू लागला.पुढच्या १५ सेकंदांतच ट्रकने नदीपात्रात पलटी मारली.त्यानंतर पुन्हा सरळ होऊन ट्रकचा काही भाग पुलाला अडकून राहिला.नागरिक चालकाला ट्रकमधून बाहेर पडण्याचे आवाहन करीत होते.असा संपूर्ण २ मिनिटे १२ सेकंदांचा जीवनमृत्यूचा थरार मोबाइलमध्ये कैद झाला आहे.त्यानंतर चालक व क्लीनर केबिनमधून बाहेर पडत,ट्रकवर चढले.मात्र, तोपर्यंत ट्रक पाण्यात बुडायला लागला होता.त्यानंतर ट्रकसह चालक व क्लीनर वाहून जात असल्याचे दृश्य नागरिक बिघतले,वाहून गेलेल्या ट्रकसह चालक व क्लीनरचा यंत्रणेकडून शोध सुरू आहे.सदर ट्रकचा क्रमांक माहीत नसल्यामुळे हा ट्रक कुणाचा आहे.कुठे चालला होता.चालक व क्लीनरची नावे.याबाबत यंत्रणासुद्धा अनभिज्ञ आहेत.
