न्यायालयांना बॉम्बने उडवून देण्याचे ई-मेल; सुरक्षा यंत्रणा अलर्ट मोडवर..

उद्रेक न्युज वृत्त :-महाराष्ट्र राज्याची राजधानी मुंबई तसेच उपराजधानी नागपूर येथील न्यायालयांना आज,गुरुवार १८ डिसेंबरला बॉम्बने उडवून देण्याची धमकी असणारे ‘ई-मेल’ न्यायालय प्रशासनास मिळताच परिसरात एकच खळबळ माजली.मुंबईतील वांद्रे न्यायालय तर नागपूरच्या जिल्हा सत्र न्यायालयाला बॉम्बने उडवून देण्याची धमकी एका ई-मेलद्वारे देण्यात आली.सुरक्षेच्या दृष्टीने वांद्रे न्यायालय परिसर आणि आजूबाजूच्या परिसरात कसून तपासणी करण्यात आली.न्यायालयात उपस्थित असलेल्या नागरिकांना सतर्क करण्यात आले.काही तास चाललेल्या तपासणीनंतर कोणतीही संशयास्पद वस्तू किंवा स्फोटक आढळून आले नाही.अश्याच प्रकारे नागपूरच्या जिल्हा सत्र न्यायालयाला बॉम्बने उडवून देण्याची धमकीचा ई-मेल हा मुंबईहून पाठविण्यात आला होता.मुंबईहून पाठवण्यात आलेल्या ई-मेलमध्ये आयएसआय(ISI)चा उल्लेख करण्यात आला होता.दुपारी दोनच्या सुमारास बॉम्बस्फोट घडवून आणण्याची धमकी देण्यात आली होती.धमकीनंतर नागपूर जिल्हा सत्र न्यायालय परिसरात तातडीने मोठ्या प्रमाणात पोलीस बंदोबस्त वाढवण्यात आला.बॉम्ब निरोधक पथकाकडून संपूर्ण न्यायालय परिसराची झाडाझडती घेण्यात आली. सुदैवाने येथेही कोणतेही स्फोटक आढळून आले नसल्याचे प्राथमिक तपासात स्पष्ट झाले.दरम्यान, पोलिसांनी धमकीचा ई-मेल नेमका कुठून पाठवण्यात आला,कोणी पाठवला आणि त्यामागील उद्देश काय?  याचा तपास सुरू केला आहे. यासाठी सायबर सेलच्या मदतीने ई-मेलचा स्रोत,आयपी ॲड्रेस आणि तांत्रिक माहिती तपासली जात आहे.