धानाच्या बोनसची ५० टक्के निधी आली; पण कुणाला मिळणार शेतकऱ्यांमध्ये धाकधूक वाढली..!

गडचिरोली :-राज्याच्या महायुती सरकारने शासकीय धान खरेदी केंद्रांवर धानाची विक्री करणाऱ्या शेतकऱ्यांना हेक्टरी २० हजार रुपये बोनस देण्याचे जाहीर केले होते.त्यानुसार बोनस केव्हा मिळणार? याची शेतकरी आतुरतेने वाट पाहत होते.अश्यातच आता सध्याच्या घडीला शासन स्तरावरून शेतकऱ्यांच्या बोनससाठी ५० टक्के निधी देण्यात आला आहे. मात्र,सदरचा निधी कुणाला मिळणार आहे,याची धाकधूक शेतकऱ्यांमध्ये वाढली आहे.कारण,यापूर्वी प्रत्यक्ष धान विक्री करणारे शेतकरी व धान विक्री न करताच केवळ शासकीय धान खरेदी केंद्रावर ऑनलाईन करणाऱ्या शेतकऱ्यांच्या खात्यातही बोनसची रक्कम टाकण्यात आली होती. त्यामुळे शेतकऱ्यांचा आनंद काहीकाळ गगनात मावेनासा झाला होता.मात्र,आता ५० टक्के निधीत बोनससाठी नंबर लागणार की नाही? असा प्रश्न निर्माण झाला आहे.

प्रत्यक्ष धानाची विक्री करणाऱ्या सर्वच शेतकऱ्यांना पहिल्या पन्नास टक्के निधीतून बोनसचे वितरण करण्यात येणार आहे.मात्र,यासाठी आदिवासी विकास विभागाकडे वेगवेगळ्या तीन याद्या तयार करण्यात आल्याची माहिती आहे.पहिल्या यादीनुसार सुरुवातीला बोनसचे वितरण होण्याची दाट शक्यता आहे.सोबतच वनहक्क पट्टेधारक शेतकऱ्यांची दुसरी यादी,तर दोन्ही याद्यांमध्ये नावांचा समावेश नसलेल्या शेतकऱ्यांची तिसरी यादी तयार करण्यात आली आहे.या याद्यांमधून ज्यांची कागदपत्रे बरोबर आहेत,त्यांच्या खात्यात बोनसची रक्कम जमा होणार आहे.येत्या दोन दिवसात अनेक शेतकऱ्यांच्या बँक खात्यात बोनसची रक्कम जमा होणार आहे. त्यासाठी प्रक्रिया सुरू झाली आहे.