जाहीर सभेत भाजप उमेदवाराची जीभ घसरली.. – गावात रोज-रोज येऊन तुमचे काय मुके घ्यायचे का?

उद्रेक न्युज वृत्त :-विधानसभा निवडणुकीचा प्रचार शिगेला पोहोचला असतांनाच काही उमेदवार व नेत्यांकडून वादग्रस्त वक्तव्ये केली जात आहेत. भाजपाचे आमदार बबनराव लोणीकर,खासदार धनंजय महाडिक यांच्यानंतर आता पक्षाचे नांदेडच्या किनवटमधील उमेदवार भीमराव केराम यांचे बेताल वक्तव्य समोर आले आहे.रोज-रोज गावात येऊन तुमचे काय मुके घ्यायचे का? असे वक्तव्य भाजपाचे उमेदवार व विद्यमान आमदार भीमराव केराम यांनी केले.विशेष म्हणजे पक्षाच्या नेत्या आमदार पंकजा मुंडे या व्यासपीठावर उपस्थित असतांनाच केराम यांनी हे वक्तव्य केले.केराम यांच्या प्रचारार्थ बोधडी येथे पंकजा मुंडे यांची जाहीर सभा झाली. दरम्यान,गेल्या निवडणुकीपासून आमदार केराम गावात फिरकले नाहीत; अशी तक्रार नागरिक करीत असतात.यावर केराम यांची जीभ घसरली. मंत्रालयात काम असते,तेथे वेळ देऊन गावासाठी निधी आणण्याचे काम मी करतो,गावात येऊन काय तुमचे मुके घ्यायचे का? असे ते म्हणाले.या वक्तव्यावरून केराम यांच्या अडचणी वाढण्याची शक्यता आहे.केराम यांच्यासाठी पक्षाचे नेते तथा उपमुख्यमंत्री देवेंद्र फडणवीस यांनीही सभा घेतली होती.त्यानंतर सोमवारी पंकजा मुंडेही प्रचारासाठी आल्या होत्या.केराम यांच्या विरोधात राकाँ शरद पवार गटाचे प्रदीप नाईक रिंगणात आहेत.केराम यांच्या मुका घेण्याच्या वक्तव्याची सध्या जोरदार चर्चा आहे.