चोप ग्रामपंचायत पदाधिकाऱ्यांचा मुख्य कार्यकारी अधिकाऱ्यांच्या हस्ते सत्कार…

गडचिरोली :-जिल्ह्याच्या देसाईगंज तालुक्यातील  चोप येथे पुरस्कार प्राप्तीत गावपातळीवर विविध उपक्रम राबविण्यात ग्रामपंचायत पदाधिकाऱ्यांचा सिंहाचा वाट असल्याने आज,गुरुवार २४ एप्रिलला पंचायत राज दिनाचे औचित्य साधून जिल्हा परिषद गडचिरोली येथे जिल्हा परिषदेचे मुख्य कार्यकारी अधिकारी सुहास गाडे यांच्या हस्ते चोप ग्रामपंचायतीचे सरपंच नितीन लाडे, ग्रामसेविका मेघना राऊत व उपसरपंच प्रकाश डोंगरवार यांचा शाल,श्रीफळ व सन्मानचिन्ह देऊन सत्कार करण्यात आला.चोप ग्रामपंचायतीने विविध उपक्रम राबवून सन २०२०-२१ मध्ये स्मार्ट ग्राम(सुंदरग्राम)स्पर्धेत तालुकास्तरीय तसेच जिल्हास्तरीय प्रथम क्रमांक पटकावला होता.तर सन २०२३-२४ मध्ये संत गाडगेबाबा ग्रामस्वच्छता अभियानात जिल्हास्तरीय प्रथम क्रमांक पटकावून जिल्ह्यात बहुमान मिळवला होता.त्यातच चोप ग्रामपंचायत पदाधिकाऱ्यांनी शासनाच्या विविध शासकीय योजनांची अंमलबजावणी,स्वच्छता अभियान, वृक्ष लागवड, सामाजिक सलोखा तसेच इतर उपक्रम यशस्वीपणे राबविण्यात मोलाची भूमिका बजावल्याने आज गुरुवारी जिल्हा परिषदेचे मुख्य कार्यकारी अधिकारी सुहास गाडे यांच्या हस्ते विविध मान्यवरांच्या  उपस्थितीत ग्रामपंचायत पदाधिकाऱ्यांचा सत्कार सोहळा पार पडला.