गडचिरोली जिल्ह्यातील डॉक्टरची अफलातून करामत… -शासकीय रुग्णवाहिकेचा वापर करून सवंगड्यांसोबत मिळून करायचा दारूची वाहतूक..

गडचिरोली :-गडचिरोली जिल्ह्यातील एका कंत्राटी डॉक्टरची अफलातून करामत जिल्ह्याच्या एटापल्ली तालुक्यातून १७ सप्टेंबरला उघडकीस आली.एका डॉक्टरला शासकीय रुग्णवाहिकेतून चक्क दारूची वाहतूक करताना पोलिसांनी रंगेहाथ पकडले आहे. एकीकडे तापाने फणफणलेल्या दोन चिमुकल्यांचा मृत्यू झाल्यानंतर वाहन उपलब्ध करून न दिल्याने जन्मदात्यांना त्यांचे मृतदेह खांद्यावर घेऊन १५ किलोमीटर पायपीट करावी लागल्याची घटना १२ दिवसांपूर्वी अहेरी तालुक्यातील पत्तीगाव येथे उघडकीस आली होती.याच परिसरातील तस्करीच्या घटनेने आता आरोग्य विभागातील वर्तुळ हादरले आहे.

ब्रम्हानंद रैनू पुंगाटी वय २९ वर्षे,रा.बारसेवाडा, ता. एटापल्ली असे डॉक्टरचे नाव आहे.नक्षलप्रभावित व आदिवासीबहुल पिपली बुर्गी प्राथमिक आरोग्य केंद्रात तो कंत्राटी वैद्यकीय अधिकारी म्हणून कार्यरत होता. १५ सप्टेंबर रोजी पहाटे हालेवारा पोलिस मवेली हालेवारा पीपली बुर्गी या मार्गावर नाकाबंदी करत होते.यावेळी एमएच ३३ टी ४४७८ ही तेथून जात होती.रुग्णवाहिका असल्याने पोलिसांनी सुरुवातीला दुर्लक्ष केले,पण चालकाने गाडी सुसाट नेण्याचा प्रयत्न केला.त्यामुळे पोलिसांचा संशय बळावला.पोलिसांनी पाठलाग करत रुग्णवाहिका थांबवून तपासणी केली असता आत देशी दारूचे १० बॉक्स व विदेशी दारूच्या ९६ बाटल्या आढळल्या.पोलिसांनी डॉ. ब्रम्हानंद पुंगाटी याच्यासह शशिकांत बिरजा मडावी वय ३३ वर्षे,रा. एटापल्ली,सौरभ गजानन लेखामी वय २० वर्षे,रा.पिपली बुर्गी,भिवाजी रैनू पदा वय ३१ वर्षे, रा.पिपली बुर्गी यांना ताब्यात घेतले तर अंधाराचा फायदा घेत दिलीप लालू लेखामी रा.पिपली बुर्गी हा पळून गेला.चारही आरोपींना एटापल्ली न्यायालयात हजर करण्यात आले.न्यायालयाने त्यांना दोन दिवस पोलिस कोठडीत ठेवण्याचे आदेश दिले.

पोलिसांच्या कारवाईनंतर जिल्हा परिषद सीईओ आयुषी सिंह यांनी कंत्राटी वैद्यकीय अधिकारी डॉ. ब्रम्हानंद पुंगाटी यास तडकाफडकी बडतर्फ केले आहे. यात सहभागी अन्य कर्मचारीही रडारवर आहेत. त्यांच्यावरही कारवाई अटळ मानली जात आहे.