कृत्रिम वाळू उद्योग सुरू करायचाय तर करा अर्ज..

गडचिरोली :-जिल्ह्यात अलीकडील काळात नागरीकरणासोबतच पायाभूत सुविधांमध्ये होणारी वाढ तसेच प्रधानमंत्री आवास योजना,स्मार्ट गाव मिशन, प्रधानमंत्री ग्राम सडक योजना,सिंचन प्रकल्प आदी योजनांमुळे बांधकाम क्षेत्रात झपाट्याने वाढ होत आहे. यामुळे नदीपात्रातील दर्जेदार वाळूची मागणी वाढली आहे.मात्र,नद्यांच्या पर्यावरणीय समतोलाच्या दृष्टीने नागरिकांनी व बांधकाम क्षेत्राशी निगडीत व्यावसायिकांनी नैसर्गिक वाळूचा पर्याय म्हणून स्वस्तात उपलब्ध होत असलेल्या एम-सॅन्डचा (कृत्रिम वाळू) जास्तीत जास्त वापर करावा,असे आवाहन जिल्हाधिकारी यांनी केले आहे.

महसूल विभागाच्या २३ मे २०२५ चा शासन निर्णय व १७ जुलै २०२५ चे परिपत्रकानुसार कृत्रिम वाळू धोरण निश्चित करण्यात आले असून त्याची अंमलबजावणी करण्याची कार्यपद्धतीही स्पष्ट करण्यात आली आहे.

एम-सॅन्डचे कण नैसर्गिक वाळूपेक्षा अधिक कोनीय व खडबडीत असल्याने ते सिमेंटसोबत उत्तम मिसळतात.त्यात गाळ व सेंद्रिय घटकांचे प्रमाण कमी असल्याने काँक्रीटची गुणवत्ता सुधारते व टिकाऊपणा वाढतो.नियंत्रित परिस्थितीत तयार होत असल्याने कणाचा आकार एकसारखा राहतो व काम सुलभ होते.काँक्रीटमध्ये पाणी व सिमेंटचा वापर कमी होतो, आर्थिक बचत होते व मजबुती वाढते.तसेच एम-सॅन्ड नदीच्या वाळूपेक्षा स्वस्त असून सहज उपलब्ध होऊ शकते.

एम-सॅन्ड उद्योग सुरू करण्यास इच्छुकांनी जिल्हाधिकारी कार्यालय गडचिरोली तसेच सर्व तहसिल कार्यालयात ऑफलाईन अर्ज सादर करावा. याशिवाय शासनाच्या www.mahakhanij.maharashtra.gov.in या संकेतस्थळावर Application > M-sand Concession application > Application for private land (New quarry) / Application for private land (Ongoing quarry) या लिंकवर जाऊन ऑनलाईन अर्ज करता येईल.

अर्ज सादर करतांना अडचणी आल्यास जिल्हाधिकारी कार्यालयातील खनिकर्म शाखेशी संपर्क साधावा. तसेच www.gadchiroli.nic.in या जिल्हा प्रशासनाच्या संकेतस्थळावरही सविस्तर माहिती उपलब्ध आहे.