आता विद्यार्थ्यांना बस पाससाठी रांगेत उभे राहण्याची गरज नाही; थेट शाळेतूनच पास होणार वितरित..

उद्रेक न्युज वृत्त :-शासनाच्या “पुण्यश्लोक अहिल्याबाई होळकर” योजनेअंतर्गत बारावीपर्यंत शिक्षण घेणाऱ्या सर्व विद्यार्थिनींना मोफत एसटी पासचे वितरण केले जाते.यासाठी विद्यार्थी-विद्यार्थिनींना एसटीच्या पास केंद्रावर जाऊन रांगेत उभा राहून पास घ्यावे लागत होते किंवा गटागटाने आगारात जाऊन आगार व्यवस्थापनाकडून पास काढून घेतल्या जात होते.आता विद्यार्थ्यांना बस पाससाठी रांगेत ताटकळत उभे राहण्याची गरज नाही.तर त्यांच्या शाळा-महाविद्यालयांनी पुरवलेल्या यादीनुसार एसटीच्या कर्मचाऱ्यांकडून विद्यार्थी-विद्यार्थिनींना त्यांचे बस पास थेट शाळेत देण्यात येणार आहेत.जेणेकरून त्यांचा शैक्षणिक वेळ वाया जाणार नाही.नवीन शैक्षणिक वर्षाच्या पहिल्या सत्रातील शाळा काही जिल्हे वगळून इतर जिल्ह्यातील शाळा ह्या उद्या, सोमवार १६ जून पासून सुरू होत आहेत.घरापासून शाळेपर्यंत जाण्यासाठी शासनाने विद्यार्थ्यांना एसटीच्या माध्यमातून ६६.६६ टक्के इतकी सवलत दिली आहे म्हणजे केवळ ३३.३३ टक्के रक्कम भरून विद्यार्थ्यांना मासिक पास काढता येणार आहे.या संदर्भात उद्या,सोमवार १६ जून पासून एसटी प्रशासनातर्फे “एसटी पास थेट तुमच्या शाळेत” हि विशेष मोहीम राबविण्यात येत आहे.तत्पूर्वी सर्व शाळा महाविद्यालयाच्या मुख्याध्यापक व प्राचार्य यांना एसटीच्या आगार व्यवस्थापकांनी पत्र देऊन आपल्या शाळेत नवीन वर्षात शिकणाऱ्या विद्यार्थी विद्यार्थ्यांची यादी तयार ठेवण्यास सांगितले आहे.या अभिनव योजनेचा लाभ राज्यभरात शिक्षण घेणाऱ्या लाखो विद्यार्थी-विद्यार्थिनींना होणार आहे,असे परिवहन मंत्री तथा एसटी महामंडळाचे अध्यक्ष प्रताप सरनाईक यांनी म्हटले आहे.