शिक्षण सेवक व शिक्षक पदभरती प्रक्रियेस सुरुवात; राज्यात ३० हजार २०९ रिक्त पदांची भरती..

​गडचिरोली :-महाराष्ट्र राज्यातील सर्व स्थानिक स्वराज्य संस्था व खाजगी व्यवस्थापनाच्या शाळांमध्ये ‘पवित्र पोर्टल’द्वारे शिक्षण सेवक आणि शिक्षक पदभरतीची कार्यवाही सुरू करण्यात आली आहे.

या प्रक्रियेअंतर्गत राज्यात एकूण ३० हजार २०९ रिक्त पदांची भरती करण्यात येणार असून,यामध्ये गडचिरोली जिल्ह्यातील एकूण ८२८ पदे भरली जाणार आहेत.पात्र उमेदवारांनी आपले पसंतीक्रम येत्या,मंगळवार ११ ऑगस्ट २०२६ पर्यंत पोर्टलवर लॉक करावेत,असे आवाहन गडचिरोली जिल्हा परिषदेचे मुख्य कार्यकारी अधिकारी सुहास गाडे यांनी केले आहे.

​शिक्षक अभियोग्यता व बुद्धिमत्ता चाचणी (TAIT-२०२५)दिनांक-२७ मे २०२५ ते ०५ जून २०२५ या कालावधीत घेण्यात आली होती.या चाचणीतील प्राप्त गुणांच्या आधारे इयत्ता १ ली ते १२ वी करिता रिक्त पदांची भरती करण्यात येत आहे. शासनाच्या आदेशानुसार संबंधित व्यवस्थापनातील रिक्त पदे आणि आरक्षणाचा विचार करून ८० टक्के पदांसाठी ही भरती प्रक्रिया नियोजित आहे.

• गडचिरोली जिल्हा परिषद पदभरती(एकूण पदे: ८२८)👇

​गडचिरोली जिल्ह्यासाठी एकूण ८२८ पदे भरली जाणार असून त्याचा पदनिहाय तपशील खालीलप्रमाणे आहे:

​इयत्ता १ ली ते ५ वी: ८१५ पदे

​इयत्ता ६ वी ते ८ वी: ९ पदे

​इयत्ता ९ वी ते १० वी: ४ पदे (मराठी माध्यम- २, हिंदी माध्यम – २)

​ संकेतस्थळ: उमेदवारांनी लॉगिन करून प्राधान्यक्रम जनरेट करण्यासाठी tait2025.mahateacherrecruitment.org.in या संकेतस्थळाला भेट द्यावी.

​पसंतीक्रम नोंदविण्याची मुदत: पदनिहाय पसंतीक्रम नमूद करण्याची सुविधा दिनांक ०६/०८/२०२६ रोजी उपलब्ध करून देण्यात आली असून,उमेदवारांनी आपले पसंतीक्रम ११/०८/२०२६ पर्यंत दिलेल्या मुदतीत लॉक करणे अनिवार्य आहे.

​ पुढील प्रक्रिया: उमेदवारांची प्राधान्यक्रमाची कार्यवाही पूर्ण झाल्यानंतर,मुलाखतीशिवाय या प्रकारातील गुणवत्ता यादी प्रसिद्ध करण्यात येईल.

​संपर्क/तक्रार निवारण: पदभरतीशी संबंधित उमेदवारांचे कोणतेही म्हणणे किंवा मागणी असल्यास त्यांनी edupavitra25@gmail.com या ई-मेलवर पाठवावे,जेणेकरून प्रशासनाकडून त्याची योग्य ती दखल घेतली जाईल.

​जिल्ह्यातील जास्तीत जास्त पात्र उमेदवारांनी विहित वेळेत पोर्टलवरील कार्यवाही पूर्ण करून या संधीचा लाभ घ्यावा,असे आवाहन प्रशासनातर्फे करण्यात आले आहे.