मोठी बातमी आता एक्झिट पोलसह ओपिनियन पोल जाहीर करण्यास सक्त मनाई- भारत निवडणूक आयोगाचे निर्देश..

उद्रेक न्युज वृत्त :-निवडणुकीच्या पार्श्वभूमीवर तसेच मतदानापूर्वी एक्झिट पोलसह ओपिनियन पोल अनेक वृत्तपत्रे,वृत्त वाहिन्या तसेच इलेक्ट्रॉनिक मीडिया वा सोशल मीडियावर जाहीर करून संभ्रम निर्माण केले जाते.त्यामुळे राज्यातील विधानसभा निवडणुकीच्या पार्श्वभूमीवर मतदान कालावधीमध्ये कोणत्याही प्रकारची मतदानोत्तर जनमत चाचणी (एक्झिट पोल) जाहीर करण्यास भारत निवडणूक आयोगाने मनाई केली आहे.याशिवाय मतदान संपण्याच्या वेळेपूर्वी अठेचाळीस तासाच्या कालावधीत कोणत्याही प्रकारचे मत सर्वेक्षण (ओपिनियन पोल) जाहीर करण्यासही सक्त मनाई करण्यात आली आहे.

राज्यात दिनांक-२० नोव्हेंबर २०२४ रोजी विधानसभा सार्वत्रिक निवडणूकीचे मतदान पार पडणार आहे.या पार्श्वभूमीवर भारत निवडणूक आयोगाने अधिसूचित केल्यानुसार,दिनांक-१३ नोव्हेंबर,२०२४ रोजी सकाळी ७ ते दिनांक-२० नोव्हेंबर,२०२४ रोजी सायंकाळी ६:३० वाजेपर्यंत विधानसभेच्या सार्वत्रिक निवडणुका संदर्भात कोणत्याही एक्झिट पोलचा निकाल वृत्तपत्रे इलेक्ट्रॉनिक माध्यमे अथवा अन्य कोणत्याही प्रकारे त्यातील अंदाज आयोजित करणे आणि प्रकाशित करणे किंवा प्रसारित करण्यास (एक्झिट पोल) प्रतिबंध करण्यात आलेला आहे.तसेच लोकप्रतिनिधीत्व कायदा १९५१ च्या कलम १२६ (१) (ब) नुसार,विधानसभा सार्वत्रिक निवडणुका आणि नांदेड लोकसभा मतदारसंघाच्या पोटनिवडणुकांच्या संदर्भात मतदानाच्या समाप्तीसाठी निश्चित केलेल्या वेळेआधी ४८ तासांच्या कालावधीत निवडणुकीशी संबंधित मजकूर दाखविण्यास तसेच कोणत्याही इलेक्ट्रॉनिक मीडियामध्ये कोणतेही ओपिनियन पोल किंवा निवडणूक सर्वेक्षण अंदाज प्रदर्शित करण्यास मनाई असेल,असे भारत निवडणूक आयोगामार्फत स्पष्ट करण्यात आले आहे.