भीषण स्फोटाने हादरली देशाची राजधानी; आठ जणांचा मृत्यू…

उद्रेक न्युज वृत्त :-देशाची राजधानी दिल्ली एका भीषण स्फोटाने हादरली असल्याची घटना उघडकीस आली आहे.दिल्लीच्या ऐतिहासिक लाल किल्ल्यापासून काही मीटर अंतरावर असलेल्या मेट्रो स्थानकाच्या गेट क्रमांक एक जवळ एका उभ्या असलेल्या कारमध्ये भीषण स्फोट झाल्याची घटना आज,सोमवार १० नोव्हेंबर रोजी सायंकाळी पावणे सहाच्या दरम्यान घडली असून परिसरात उभी असलेली अनेक वाहने जळून खाक झाली.तर घडलेल्या भीषण स्फोटात ८ जणांचा मृत्यू तर दहाच्यावर नागरिक गंभीर जखमी झाले आहेत.मृतांचा तसेच जखमींचा आकडा वाढण्याची शक्यता वर्तविण्यात येत आहे.घटनेने परिसरात एकच खळबळ माजली असून घटना घडताच राष्ट्रीय सुरक्षा दलाची तुकडी,अग्नीशामक दल घटनास्थळी दाखल होत वरिष्ठ पोलिस अधिकारी आणि सुरक्षा यंत्रणांनी तपासकार्य सुरु केले आहे. घटनेमुळे दिल्लीत हायअलर्ट जारी करण्यात आला आहे. त्याचबरोबर,मुंबईसह देशातील इतर भागांमध्येही हाय अलर्ट जारी करण्यात आला आहे.दिल्लीतील स्फोटानंतर मुंबई पोलीस अलर्ट मोडवर असल्याची माहिती आहे. विशेष म्हणजे,तीन दिवसांपूर्वीच दिल्ली पोलिसांनी मोठी कारवाई करत इसिसच्या चार दहशतवाद्यांना स्फोटकांसह अटक केली होती.अश्यातच आज भीषण स्फोटाची घटना घडल्याने सुरक्षा यंत्रणा अलर्ट मोडवर येत घटनेचा कसून तपास करीत आहे.