पदवीधर मतदारसंघ निवडणूक; आता खासगी आस्थापनांमधील कर्मचाऱ्यांना चार तासांची विशेष सवलत.. -जिल्हाधिकारी व पोलीस अधीक्षकांकडून निवडणूक साहित्य वाटप व्यवस्था व स्ट्राँग रूमची पाहणी..

गडचिरोली :-नागपूर विभाग पदवीधर मतदारसंघाच्या द्विवार्षिक निवडणुकीत मतदानाचा हक्क बजावण्यासाठी खासगी आस्थापनांमध्ये कार्यरत कर्मचाऱ्यांना पूर्वी जाहीर करण्यात आलेल्या दोन तासांऐवजी आता चार तासांची विशेष सवलत (नैमित्तिक रजा)देण्याचे निर्देश देण्यात आले आहेत.

भारत निवडणूक आयोगाने जाहीर केलेल्या कार्यक्रमानुसार,नागपूर विभाग पदवीधर मतदारसंघासाठी येत्या,शुक्रवार २३ ऑक्टोंबर २०२६ रोजी सकाळी ८ ते दुपारी ४ या वेळेत मतदान पार पडणार आहे.

सुरुवातीला खासगी आस्थापनांमधील मतदारांना मतदान करण्यासाठी दोन तासांची सवलत देण्याबाबत कळविण्यात आले होते.मात्र,काही ठिकाणी मतदान केंद्रांचे अंतर जास्त असल्याने मतदारांना प्रवासासाठी अधिक वेळ लागतो.ही बाब लक्षात घेऊन राज्य निवडणूक आयोगाकडून मतदारांची गैरसोय टाळण्यासाठी ही सवलत दोन तासांवरून वाढवून चार तास करण्यात आली असल्याचे सहायक निवडणूक निर्णय अधिकारी तथा अपर आयुक्त(सा.प्र.)प्रदीप कुलकर्णी यांनी कळविले आहे.अश्यातच महाराष्ट्र विधान परिषदेच्या नागपूर विभाग पदवीधर मतदारसंघाच्या निवडणुकीच्या पार्श्वभूमीवर जिल्हाधिकारी अविश्यांत पंडा आणि जिल्हा पोलीस अधीक्षक एम.रमेश यांनी आज बुधवारी जिल्हा औद्योगिक प्रशिक्षण संस्था (आयटीआय)येथील निवडणूक साहित्य वाटप व्यवस्था आणि जिल्हा कोषागार कार्यालयातील स्ट्राँग रूमची पाहणी केली.