नक्षल्यांनी जंगलात पुरुन ठेवलेली स्फोटके आढळली; पोलिसांनी केली नष्ट…

गडचिरोली :-नक्षली नवनवीन क्लृप्त्या वापरून  घातपात घडवून आणण्याचा प्रयत्न करीत आहेत. अशातच आज,रविवारी १५ डिसेंबरला अहेरी तालुक्याच्या मरपल्ली पोलिस मदत केंद्रांतर्गत येणाऱ्या करंचा गावानजीकच्या जंगलात नक्षल्यांनी स्फोटके पुरुन ठेवलेली होती.एका प्लॉस्टिक ड्रममध्ये स्फोटके दडवून ठेवल्याची माहिती मिळाल्यानंतर जिमलगट्टाचे उपविभागीय पोलिस अधिकारी शशिकांत दसूरकर यांच्या नेतृत्वात मरपल्ली पोलिस मदत केंद्रातील पोलिस आणि राज्य राखीव दलाच्या जवानांनी आज रविवारी परिसरात शोध मोहीम राबविली.शोध मोहिमेदरम्यान पोलिसांना ड्रममध्ये स्फोटके आढळून आली.त्यात दोन किलो आयईडी स्फोटके,तीन वायर बंडल,एक बॅटरी,एक डिटोनेटर इत्यादी साहित्य होते.पोलिसांनी अहेरी येथील प्राणहिता पोलिस उपमुख्यालयातील बॉम्ब शोधक पथकास पाचारण करुन त्यांच्या मदतीने ही स्फोटके नष्ट करण्यात आली असल्याने नक्षल्यांचा घातपाताचा कट पोलिसांनी हाणून पाडला आहे.