नक्षलवादी आणि जवानांमध्ये चकमक; ५ नक्षली ठार

गडचिरोली :-आगामी विधानसभा सार्वत्रिक निवडणुकीच्या अनुषंगाने जिल्ह्यामध्ये विध्वंसक कारवाया करून घातपात घडविण्याच्या उद्देशाने मागील दोन दिवसांपासून काही नक्षलवादी एकत्र येऊन कट रचण्याच्या तयारीत होते.गडचिरोली महाराष्ट्र व नारायणपूर छत्तीसगड सीमेलगत असलेल्या कोपर्शी तालुका भामरागड जंगल परिसरात नक्षलवादी दबा धरून बसल्याची गोपनीय माहिती विश्वसनीय सूत्रांकडून मिळाल्याने अप्पर पोलीस अधीक्षक अभियान यतिश देशमुख व अप्पर पोलीस अधीक्षक प्रशासन एम.रमेश यांचे नेतृत्वात सी ६० पथकाच्या २२ तुकड्या व सीआरपीएफ च्या QAT च्या २ तुकड्या या कोपर्शी जंगल परिसरात मोहीम राबवत आहेत.येथील दोन वेगवेगळ्या ठिकाणी नक्षलवाद विरोधी अभियान राबविण्याकरिता या तुकड्या रवाना करण्यात आल्या आहेत.त्यातच आज,सोमवारी २१ ऑक्टोंबरला नक्षलवादी व जवानांमध्ये चकमक झाल्यानंतर ५ माओवाद्यांचा खात्मा करण्यात आला आहे.

गडचिरोली पोलिसांचे पथक जंगल परिसरात पोहोचताच नक्षलवाद्यांनी पोलीस पथकाच्या दिशेने अंदाधुंद गोळीबार करण्यास सुरुवात केली.यावेळी पोलीस पथकाकडून माओवाद्यांना शस्त्र खाली टाकून शरण येण्याचे आवाहन करण्यात आले होते.परंतु, नक्षलवाद्यांनी शरण न येता पोलीस पथकावर अंदाधुंद गोळीबार सुरू ठेवला.गोळीबाराला प्रत्युत्तर देताना पोलीस पथकाकडून दोन्ही वेगवेगळ्या ठिकाणी गोळीबार करावा लागला.या अभियानात ५ नक्षलवाद्यांना कंठस्नान घालण्यात गडचिरोली पोलीस दलास यश प्राप्त झाले आहे.जंगल परिसरात शोधमोहीम सुरू असून मृत माओवाद्यांची ओळख पटवण्याची प्रक्रिया पोलिसांकडून सुरू आहे