दहावी आणि बारावीच्या परीक्षांचे संभाव्य वेळापत्रक जाहीर..

उद्रेक न्युज वृत्त :-महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी-मार्च महिन्यात घेण्यात येणाऱ्या दहावी आणि बारावीच्या परीक्षांचे संभाव्य वेळापत्रक आज,गुरुवार १७ सप्टेंबरला जाहीर करण्यात आले आहे.त्यानुसार,८ फेब्रुवारी ते १६ मार्च २०२७ या कालावधीत बारावीची परीक्षा पार पडेल,तर दहावीच्या परीक्षेसाठी १५ फेब्रुवारी ते ११ मार्च २०२७ हा कालावधी निश्चित करण्यात आला असल्याची माहिती राज्य मंडळाचे सचिव डॉ.दीपक माळी यांनी दिली आहे.राज्य शिक्षण मंडळाच्या पुणे,नागपूर,औरंगाबाद, मुंबई,कोल्हापूर,अमरावती,नाशिक,लातूर,कोकण या नऊ विभागीय शिक्षण मंडळांतर्गत दहावी आणि बारावीची अंतिम परीक्षा घेण्यात येते.विद्यार्थ्यांना अभ्यासाचे अतिरिक्त नियोजन करता यावे यासाठी गेल्या काही वर्षापासून जुलै किंवा ऑगस्टमध्येच दहावी आणि बारावीच्या परीक्षांचे संभाव्य वेळापत्रक जाहीर करण्यात येत आहे.परंतु यंदा एक महिना उशिरा म्हणजेच सप्टेंबर महिन्यात दहावी आणि बारावी परीक्षांचे वेळापत्रक जाहीर करण्यात आले आहे.मंडळाच्या वेबसाईटवरील संभाव्य वेळापत्रकाची सुविधा ही फक्त माहितीसाठी असून परीक्षेपूर्वी माध्यमिक शाळा,उच्च माध्यमिक शाळा व कनिष्ठ महाविद्यालय यांच्याकडे छापील स्वरुपात दिले जाणारे वेळापत्रक अंतिम असेल.इतर वेबसाईटवरील किंवा इतर यंत्रणेने छापलेले तसेच व्हॉट्सॲप किंवा तत्सम माध्यमातून व्हायरल होणारे वेळापत्रक ग्राह्य धरु नये,असेही बोर्डाने स्पष्ट केले आहे.