अखेर आजपासून लाडक्या बहिणींच्या खात्यात रक्कम जमा होण्यास सुरुवात.. – तीन हजार की दीड हजार?

उद्रेक न्युज वृत्त :-निवडणूक आयोगाने आचारसंहितेच्या पार्श्वभूमीवर नियमित योजनेचा लाभ देण्यास परवानगी दिल्यानंतर आज,मंगळवार १३ जानेवारीपासून राज्यातील कोट्यवधी लाडक्या बहिणींना योजनेचे पैसे मिळण्यास सुरुवात झाली आहे. महानगरपालिका निवडणुकांच्या  पार्श्वभूमीवर राज्यात आदर्श आचारसंहिता लागू असतांना ‘लाडकी बहीण’ योजनेचा नियमित किंवा प्रलंबित लाभ देता येईल; परंतु जानेवारी महिन्याचा लाभ अग्रिम स्वरुपात देण्यास राज्य निवडणूक आयोगाने मज्जाव केला आहे.त्यानुसार,केवळ डिसेंबर महिन्याचेच दीड हजार रुपये  बँक खात्यात जमा करण्यात येत आहेत.”लाडक्या बहिणींना मकर संक्रांतीची मोठी भेट देण्यासाठी १४ जानेवारी पूर्वी लाडक्या बहिणींच्या खात्यात डिसेंबर व जानेवारी महिन्याचे तीन हजार जमा होणार,” अश्या आशयाच्या प्रसिद्ध झालेल्या बातम्यांच्या आधारे राज्य निवडणूक आयोगाकडे विविध तक्रारी प्राप्त झाल्या होत्या. त्यासंदर्भातील वस्तुस्थिती जाणून घेण्यासाठी लाडकी बहिण योजनेसंदर्भात शासनाने घेतलेल्या निर्णयाबाबत स्पष्टीकरण देण्यात यावे,असे राज्य निवडणूक आयोगाने मुख्य सचिवांना कळविले होते.

विशेष म्हणजे,राज्य निवडणूक आयोगाने ४ नोव्हेंबर २०२५ रोजी स्थानिक स्वराज्य संस्थांच्या सार्वत्रिक निवडणुकांसाठी आदर्श आचार संहितेबाबत एकत्रित आदेश निर्गमित केले आहेत.या आदेशातील तरतुदींनुसार निवडणूक जाहीर होण्यापूर्वी प्रत्यक्ष सुरू झालेली विकासकामे व योजना आचारसंहिता काळात सुरू ठेवण्यास परवानगी आहे,असे मुख्य सचिवांनी आपल्या अहवालात कळविले होते.ही पार्श्वभूमी लक्षात घेता,या योजनेचा नियमित लाभ देता येईल; परंतु अग्रिम स्वरुपात लाभ देता येणार नाही; तसेच नवीन लाभार्थी देखील निवडता यणार नाहीत,असे निर्देश राज्य निवडणूक आयोगाने दिले.त्यामुळे, लाडक्या बहिणींना तीन हजार ऐवजी दीड हजार रुपये देण्यास परवानगी मिळताच, महानगर पालिकांच्या मतदानाच्या दोन दिवस अगोदर लाडक्या बहिणींच्या बँक खात्यात आजपासून दीड हजार रुपये जमा होण्यास सुरुवात झाली आहे.