‘याला’ म्हणतात प्रत्यक्षात कृती; आरमोरीच्या स्टॅम्प विक्रेत्यांना दणका देत तिघांचे परवाने निलंबित..

गडचिरोली :-नुकतेच ‘एका स्टॅम्प पेपरवर ३ टक्के कमिशन मिळूनही अतिरिक्त रकमेची वसुली..!’ या मथळ्याखाली ‘उद्रेक न्युज’ ने २५ मे २०२५ रोजी बातमी प्रसारित केली होती.त्यानुसार सुजाण नागरिकांनी आरमोरी शहराच्या स्टॅम्प विक्रेत्यांची नुकतीच पोलखोल करून जिल्हाधिकाऱ्यांकडे तक्रार केली.याची दखल घेत चौकशी करण्यात आली आणि तब्बल २९ नागरिकांचे बयाण नोंदविण्यात आले.त्यांच्या बयाणानुसार आरमोरी येथील दिलीप इन्कने,जगदीश रामटेके व चंद्रभान मेश्राम हे स्टॅम्प (मुद्रांक)विक्रेते खरेदीदारांकडून जास्तीचे पैसे घेत असल्याचे चौकशीत निष्पन्न झाल्यानंतर तिघांचेही स्टॅम्प परवाने निलंबित करण्यात आले आहेत.

आरमोरी येथील मुद्रांक विक्रेते(स्टॅम्प विक्रेते) जास्तीचे पैसे घेऊन मुद्रांक विक्री करीत असल्याची तक्रार अण्णा हजारे विचार मंचचे जिल्हाध्यक्ष बसंतसिंग बैस, तालुकाध्यक्ष अनुरथ निलेकार,तालुका सचिव देवेंद्र ब्राम्हणवाडे,आरमोरी तालुकाध्यक्ष दिवाकर रामटेके यांनी गडचिरोली जिल्हाधिकारी अवीश्यांत पंडा यांच्याकडे केली होती.तक्रारीची दखल घेत जिल्हाधिकारी यांनी उपविभागीय अधिकारी देसाईगंज यांनी आरमोरीचे नायब तहसीलदार एच. एन.दोनाडकर यांच्याकडून मुद्रांक विक्रेत्यांची चौकशी केली.चौकशीदरम्यान मुद्रांक विक्रेत्यांकडून मुद्रांक व तिकीट खरेदी केलेल्या एकूण २९ नागरिकांचे बयाण नोंदविण्यात आले.त्यांच्या बयाणानुसार आरमोरी येथील दिलीप इन्कने,जगदीश रामटेके,चंद्रभान मेश्राम हे मुद्रांक विक्रेते खरेदीदारांकडून जास्तीचे पैसे घेत असल्याचे चौकशीत स्पष्ट झाले.यात ते दोषी आढळून आले.त्यानुसार तिघांचेही मुद्रांक परवाने तात्पुरत्या स्वरुपात निलंबित करण्यात आले आहेत.

शंभर रुपयांच्या स्टॅम्प पेपरची खरेदी करतो म्हटले तर कुठे ११० रुपये तर कुठे १२० रुपये मोजावे लागतात. हुज्जत घालतो म्हटले तर तुम्हाला जिथून घ्यायचे आहे,तिथून १०० रुपयांत स्टॅम्प खरेदी करा,अशी अरेरावीची भाषा अनेक स्टॅम्प विक्रेते करतांना दिसून येतात.शासनाने याचे मूल्य ठरवून दिलेले असतांनाही त्यापेक्षा जास्त रक्कम मोजावी लागते.याबाबत कुणीही तक्रार करीत नसल्याने स्टॅम्प विक्रेते मर्जीने जास्त दर आकारून स्टॅम्प पेपरची विक्री करीत असल्याचे दिसून येते.मूळ किंमतीपेक्षा जास्त दराने मुद्रांक विक्री करू नये,असा नियम आहे. त्यानंतरही स्टॅम्प व्हेंडर(मुद्रांक विक्रेते) अतिरिक्त रक्कम आकारत असल्याचे सर्वश्रुत आहे.ग्राहकही झंझट नको म्हणून जादा रक्कम देतात. स्टॅम्प विक्रेत्यांना विक्रीवर ३ टक्के कमिशन मिळते. व्हेंडरला ठरलेले कमिशन मिळत असतांना जास्तीचे पैसे कशासाठी? हा गंभीर सवाल आहे.त्यामुळे त्यांनी जास्तीचे पैसे घेऊन ग्राहकांची पिळवणूक करू नये.

अधिकाऱ्यांनी कॅबिनबाहेर निघून ग्राहकांची समस्या सोडवावी.स्टॅम्प पेपर जास्त दराने विकले जातात, अशी ग्राहकांची ओरड असूनही कारवाई मात्र शून्यच. अधिकारी म्हणतात,लेखी तक्रार केल्यास नक्कीच कारवाई करू,अश्या आशयाची बातमी उद्रेक न्युज’ ने प्रसारित केली होती.