अखेर लाडक्या बहिणींच्या खात्यात पैसे जमा होण्यास सुरुवात; पण किती?

उद्रेक न्युज वृत्त :-गेल्या दोन महिन्यांपासून मुख्यमंत्री -माझी लाडकी बहीण योजनेच्या हप्त्याची वाट पाहणाऱ्या महाराष्ट्र राज्यातील लाखो महिलांसाठी दिलासादायक बातमी समोर आली असून,पात्र लाभार्थी महिलांच्या बँक खात्यात पैसे जमा होण्यास सुरुवात झाली आहे.विशेष म्हणजे,काही पात्र लाभार्थी महिलांच्या खात्यात दोन दिवसांपूर्वी म्हणजेच मंगळवारी दीड हजार रुपये जमा झाले,तर परत आज गुरुवारी दीड हजार रुपये असे दोन्ही महिन्याचे मिळून ३ हजार रुपये जमा झाल्याने महिलांमध्ये आनंदाचे वातावरण आहे.फेब्रुवारी महिन्यानंतर मार्च आणि एप्रिल या दोन महिन्यांचा हप्ता तांत्रिक कारणांमुळे रखडला होता.मे महिना उजाडल्यानंतरही खात्यात पैसे जमा न झाल्याने ग्रामीण भागासह शहरी भागातील लाभार्थी महिलांना आर्थिक अडचणींचा सामना करावा लागत होता.अश्यातच अनेक महिलांच्या मोबाईलवर पैसे जमा झाल्याचा संदेश धडकल्याने पात्र लाभार्थी महिलांनी समाधान व्यक्त केले. मात्र,नियमांचे उल्लंघन तसेच चुकीची माहिती देऊन योजनेचा लाभ घेणाऱ्या महिलांची नावे शोधून अश्यांना अपात्र करण्यात आल्याने लाभार्थी महिलांच्या संख्येत घट झाली आहे.केवळ पात्र आणि गरजू महिलांनाच या योजनेचा लाभ मिळावा,याची खबरदारी शासन स्तरावरून घेण्यात आली आहे.